Clichy meiddist um helgina

Arsenal hefur orðið fyrir því áfalli að missa bakvörðinn Gael Clichy í meiðsli, en talið er að hann sé fótbrotinn eftir að hann meiddist í leik með u-21 árs liði Frakka á White Hart Lane um helgina.

Læknar Arsenal eiga enn eftir að meta stöðuna, en grunur leikur á um að hann sé fótbrotinn og verði þar af leiðandi frá keppni í nokkuð langan tíma. Clichy hefur staðið sig ágætlega í fjarveru Ashley Cole, en nú þarf Arsenal að finna annan mann í staðinn til að spila stöðu hans.