Þrenna frá Marlon Harewood

Marlon Harewood skoraði þrennu í kvöld fyrir West ham í 4-0 sigri á Aston Villa í lokaleik 5. umferðar ensku úrvalsdeildarinnar. Með sigrinum komust nýliðarnir upp í 7. sæti deildarinnar. Harewood skoraði mörkin á 25 mínútna kafla, tvö á stuttum tíma um miðjan fyrri hálfleik og það síðasta á upphafsmínútum þess seinni. Teddy Sheringham lagði upp fyrsta markið fyrir Harewood á 25. mínútu, Anton Ferdinand skallaði boltann til Harewood á markteig í öðru markinu á 29. mínútu og þá nýtti Harewood sér mistök Thomas Sorensen í marki Aston Villa á 50. mínútu til þess að innsigla þrennuna. Það var síðan Ísraelsmaðurinn  Yossi Benayoun sem skoraði fjórða markið eftir glæsilegt einstaklingsframtak og kórónaði þar með afhroð lærisveina Davids O´Leary í kvöld. Hinn 39 ára gamli Teddy Sheringham var allt í öllu í liði West Ham og að flestra mati maður leiksins þótt að Harewood hafi skoraði þrennu.