Viðbrögð við Digital Íslandi framar vonum

Mesta tæknibylting í fjölmiðlun í áratugi er staðreynd og þegar hafa 20.000 íslensk heimili fengið nýjan, stafrænan myndlykil frá Digital Íslandi. Viðbrögð áskrifenda hafa verið framar vonum að sögn markaðsstjóra Íslenska útvarpsfélagsins og er starfsfólk ÍÚ í óða önn við að keyra út og afhenda áskrifendum nýja búnaðinn sem þeir fá að kostnaðarlausu. Í dag er Stöð 2 ásamt 42 öðrum sjónvarpsrásum á Digital Íslandi og er ráðgert á nýju ári að fjölga sjónvarpsrásum enn frekar. Nýr, stafrænn myndlykill tryggir hámarksmyndgæði og samhliða stafrænum útsendingum verða margs konar nýjungar í íslensku sjónvarpi kynntar. Ein þeirra nýjunga er Sýn 2 en þriðjudaginn 23. nóvember hefur hún útsendingar. Þá verða tveir leikir í Meistaradeild Evrópu sendir út samtímis, einn á Sýn og annar á Sýn 2. Áhorfendur geta því sjálfir ráðið hvaða leik þeir horfa á eða einfaldlega fylgst með báðum. Þetta er bylting í þjónustu við íþróttaáhugamenn en fyrir stafrænar útsendingar var þessi valmöguleiki ekki fyrir hendi. Nýverið var undirritaður samningur við RÚV þess efnis að Ríkissjónvarpið verði með útsendingar á Digital Íslandi. Óskað var eftir því sama við SkjáEinn en stjórn SkjásEins hafnaði því. Íslenska útvarpsfélagið harmar þessa ákvörðun sem dregur úr þjónustu við áhorfendur SkjásEins. Grunnbúnaður fyrir áhorfendur til að ná stafrænum útsendingum er nýr myndlykill og örbylgjuloftnet. Þeir sem ekki geta beðið eftir heimsókn frá Digital Íslandi geta sótt nýjan myndlykil að Krókhálsi 6, í verslanir Og Vodafone og Skífunnar og til þjónustufulltrúa. Allar nánari upplýsingar er að finna á heimasíðu Digital Ísland.