Flugher berst við engisprettur

Engisprettufaraldur af nánast biblíulegri stærðargráðu herjar nú á nokkur lönd í Vestur-Afríku. Mörg hundruð ferkílómetra engisprettuský herja á akra álfunnar og er óttast að hungursneyð og dauði geti fylgt í kjölfarið. Forseti Senegals hefur beðið Bush Bandaríkjaforseta um aðstoð og um að lýsa yfir stríði gegn engisprettum. Verst er ástandið á Malí og í Máretaníu, en í þessum löndum er vitað um nálægt eitthundrað engisprettuský sem nánast éta sig í gegnum landið, en engispretturnar geta ferðast um 130 kílómetra á einum degi. Engisprettur éta jafngildi þyngdar sinnar á dag, og þó svo að hver engispretta vegi rétt um tvö grömm ber þess að gæta að í einum ferkílómetra af engisprettuskýi eru um 80 milljónir engispretta. Eitt engisprettuský getur verið hundruð ferkílómetra að stærð og því ljóst að þessi plága étur fleiri tonn á dag, en ein af plágunum sjö sem lýst er með afar myndrænum og áhrifamiklum hætti í Opinberun Jóhannesar, níunda kafla fjallar um engisprettur sem herja eiga á menn um fimm mánaða skeið og valda þeim miklum þjáningum. Svo þykkur er engisprettumökkurinn í Vestur Afríku að hann sést greinilega á myndum sem teknar eru úr gervitunglum, og í Máretaníu er málið litið það alvarlegum augum að flugherinn hefur verið sendur á loft til að berjast við þennan vágest. Forseti Senegals hefur í bréfi til leiðtoga voldugustu ríkja heims, þar á meðal til Bush Bandaríkjaforseta, hvatt til þess að lýst verði yfir stríði gegn engisprettunum og segir hann í bréfi sínu að þær geti valdið dauða hundruð milljóna manna. Fyrir sjö árum reið sambærilegur engisprettufaraldur yfir Vestur Afríku og kostaði yfir tuttugu milljarða íslenskra króna að ráða niðurlögum hans.