Danir drepa í

Stöðugt fleiri Danir drepa í sígarettunum fyrir fullt og allt samkvæmt nýrri skoðanakönnun Gallups. Flestir þeirra sem hætta að reykja eru á aldrinum 25-34 ára en þrátt fyrir það eru reykingamenn enn fjölmennastir í þessum aldurshópi. Í könnun Gallups kemur fram að 32% af öllum Dönum eldri en 15 ára reykja en fyrir tveimur árum reyktu um 40 af hundraði í þessum aldurshópi. Á sama tíma og reykingamönnum hefur fækkað í Danmörku hefur afstaða til reykinga breyst og þá einnig meðal reykingamannanna sjálfra. Um 91% reykingamanna telur m.a. að þeir eigi alltaf að biðja um leyfi til að reykja á fundum og yngsta fólkið er aðallega fylgjandi banni við reykingum á veitingastöðum.