Þjóðarsorg í Skandinavíu

Svíar krefjast þess að Laila Freivalds utanríkisráðherra segi af sér. Hún liggur undir ámæli fyrir að hafa farið á óperusýningu á sunnudagskvöldið eftir að flóðið varð. Sendiráðið í Bangkok hafi látið vita um flóðin aðfaranótt sunnudags. Um morguninn hafi verið ljóst að hundruð hafi látið lífið og að 15 þúsund Svíar hafi verið á svæðinu. Ættingjar hafi hringt í utanríkisráðuneytið. Starfsmenn sendiráðsins í Bangkok hafi farið á svæðið en utanríkisráðherrann hafi ekki verið látinn vita fyrr en rétt fyrir hádegi á sunnudag. Hún hafi svo ákveðið að sjá óperusýninguna "Góði uppreisnarmaðurinn" á sunnudagskvöld þó að tala látinna hafi numið um 10 þúsund. Ráðherrann segist ekki hafa hugsað út í að það væri kannski ekki við hæfi að sækja slíka sýningu við þessar aðstæður. Starfsmenn sendiráðs Svía eru líka harðlega gagnrýndir. Svíar sem hafa haft samband við sendiráðið segjast hafa fengið þau svör að haft yrði samband. Það hafi aldrei orðið. Aðrir segjast hafa fengið þau svör frá sendiráðsstarfsmönnunum að þeir hafi það jafn slæmt og það fólk sem leitar eftir aðstoð. Í vefmiðlum birtast neyðaróp frá slösuðum Skandinövum í löndunum við Indlandshaf, beiðni um aðstoð og flutning heim. Fyrstu Norðmennirnir og Svíarnir lentu rétt fyrir hádegi í gær og var búist við að straumurinn yrði stöðugur. Slasaðir og börn voru látnir ganga fyrir. Svíar búast við að hafa ferjað allt sitt fólk heim á þriðjudag og Norðmenn á sunnudag. Björgunaraðgerðir Finna hafa gengið vel. Finnarnir voru færri en Norðmennirnir og Svíarnir. Skandinavísku þjóðirnar eru harmi slegnar. Búið er að lýsa yfir þjóðarsorg í Noregi og Svíþjóð á nýársdag. Fánar verða dregnir í hálfa stöng og skorað á almenning að gera slíkt hið sama. Fyrirtæki í Svíþjóð senda stuðning í stórum stíl á hamfarasvæðið, lyf, fatnað, teppi og aðrar nauðsynjar sem geta komið sér vel við björgunarstörfin. Samtök atvinnulífsins í Svíþjóð hafa skorað á fyrirtæki að senda peninga eða annan stuðning.