Hauka mæta afslappaðir gegn Kiel

Meistaraflokkslið Hauka í handknattleik karla hefur sýnt góða frammistöðu í Meistaradeild Evrópu og náð ágætis árangri þrátt fyrir að vera með sterkum liðum í riðli. Þá hefur liðið verið á hraðri siglingu í íslensku deildinni, aðeins tapað einum leik af fyrstu sjö, og trónir á toppi Norðurriðilsins. Haukarnir hafa á köflum leikið feiknagóðan handbolta og þá sérstaklega í Meistaradeildinni þegar mótspyrnan hefur verið hvað mest. Í kvöld mæta Haukar þýska liðinu Kiel en fyrri leikur liðanna fór fram í síðasta mánuði þar sem Kiel hafði betur, 35-28. Haukarnir léku prýðilega á köflum en það var við ofurefli að etja og því fór sem fór. Haukar mættu síðast franska liðinu Creteil og höfðu betur í miklum markaleik sem endaði 37-30. Það gefur því góða von um leikinn í dag og sagði Páll Ólafsson, þjálfari Hauka, að leikurinn legðist vel í sína menn. "Við erum ekki alveg búnir að negla hvort við breytum leik okkar frá síðustu viðureign liðanna," sagði Páll. "Það fer svona eftir því hvaða liði þeir munu stilla upp að þessu sinni." Að sögn Páls er mikilvægt að menn séu á tánum allan tímann því detti einbeitingin niður geti það reynst dýrkeypt. "Það sást best í leiknum gegn Savehof, þar sem stigi var hálfpartinn stolið af okkur, að menn mega ekki slá slöku við," sagði Páll. "En í dag munum við mæta afslappaðir til leiks og fyrst og fremst njóta þess að spila." Leikurinn verður ekki sýndur beint á Sýn eins og til stóð þar sem þýsk sjónvarpsstöð sem átti að sjá um útsendinguna hætti við sýna leikinn hjá sér.