2 í gæsluvarðhald vegna morðs

Tveir menn á fertugsaldri hafa verið úrskurðaðir í gæsluvarðhald í Danmörku til ellefta nóvember, vegna morðs á leigubílstjóra á sunnudagskvöld. Við yfirheyrslur yfir mönnunum tveimur í gær kom fram að þeir verða í einangrun til annars nóvember. Báðir mennirnir kærðu úrskurð um einangrun en annar þeirra hefur viðurkennt aðild að árásinni, en hann segir að ætlunin hafi verið að ræna bílstjórann. Árásarmennirnir skildu líkið eftir í vegkanti, við bæinn Köge suður af Kaupmannahöfn, og flúðu af vettvangi í leigubílnum, en bíllinn fannst í höfninni í Kaupmannahöfn í gær. Í viðtali við danska ríkissjónvarpið segir rannsóknarlögreglumaður að líklega hafi mennirnir pantað leigubílinn með því að hringja í farsíma bílstjórans. Líkið fannst á aðfaranótt mánudags og síðar um daginn voru mennirnir handteknir, en þá höfðu þeir einnig rænt söluturn danska lestarfyrirtækisins DSB.