Jafntefli mögulegt?

Ef jafn lítill munur verður á milli frambjóðenda til forsetakosninganna í Bandaríkjunum í kosningunum og skoðanakannanir sýna gætu sjónir manna beinst að Colorado fylki. Þar fara samhliða fram aðrar kosningar sem gætu breytt stöðunni til muna, og jafnvel leitt til þess að hvorugur þeirra Bush eða Kerry vinni kosningarnar. George Bush og John Kerry fá svipað fylgi í flestum skoðanakönnunum. Reyndar bendir allt til að Kerry og hans lið þurfi að spýta í lófana og taka á öllu sínu til að sigra sitjandi forseta annan nóvember því þær kannanir sem sýna einhvern mun sýna Bush með meira ívið meiri stuðning kjósenda. Þá er einungis verið að tala um fylgi þeirra sem greiða atkvæði og ekki verið að taka tillit til kosningakerfisins vestanhafs. Kjörmenn úr hverju fylki Bandaríkjanna kjósa forseta. Í langflestum ríkjum er það þannig að sá frambjóðenda sem fær flest atkvæði í fylkinu fær alla kjörmennina, þannig að í raun má segja að kosningarnar snúist um að sigra hvert fylki fyrir sig. Í Nebraska og Maine eru lög þannig að sigurvegari fylkisins fær atkvæði tveggja kjörmanna, en síðan skiptist atkvæði kjörmanna eftir sigurvegurum héraði. Í reynd hefur atkvæðunum hins vegar aldrei verið deilt. Í Colorado fylki munu kjósendur greiða atkvæði um breytingar á þessu kerfi samhliða forsetakosningunum. Breytingartillagan gengur út á það að frambjóðendur fái sama hlutfall kjörmanna og atkvæða. Stuðningsmenn tillögunnar segja það mun sanngjarnara kerfi, sem myndi betur lýsa afstöðu kjósenda. Hefði þessi tillaga verið samþykkt fyrir síðustu kosningar árið 2000 hefði Al Gore verið húsráðandi í Hvíta húsinu síðustu fjögur árin. Hefðu öll ríki hins vegar tekið upp þennan máta fyrir fjórum árum hefði hvorugur þeirra Bush eða Gore hlotið tilskilinn fjölda kjörmanna til að ná kosningu. Þá hefðu úrslit ráðist í fulltrúadeild Bandaríska þingsins.