Auðvelt hjá Schumacher

Hafi Michael Schumacher lent í ógöngum í leið sinni að sjöunda heimsmeistaratitli sínum í Formúlu 1 kappakstri að undanförnu komst hann á rétta braut aftur með góðum sigri á Suzuka brautinni í Japan um helgina. Var sigur kappans aldrei alvarlega í hættu en næstur í mark kom hinn bróðirinn, Ralf Schumacher. Keppnin í Japan var að mörgu leyti frábrugðin öðrum slíkum þar sem tímatökur og keppnin sjálf fóru fram sama daginn. Ástæðan er mikill fellibylur sem gekk yfir Japan á laugardaginn með þeim afleiðingum að vatnselgur myndaðist víða á brautinni sem keppa átti á. Var því brugðið til þess ráðs að fresta tímatökum aðfararnótt laugardagsins og klára þær áður en keppnin hæfist síðustu nótt. Biðu þess vegna margir áhugamenn spenntir enda gafst ökumönnum mun minni tími til að fullprófa vélar sínar og læra á brautina en venja er. Gaf það góð fyrirheit um að óvænt úrslit gætu litið dagsins ljós en svo varð ekki. Michael Schumacher náði ráspól í tímatökunum og náði strax forystu í keppninni. Eftir það þurfti hann aldrei að líta til baka. Bróðir hans, Ralf, barðist allann tímann um annað sæti við Jenson Button hjá BAR-Honda en Button virtist aldei eiga nóg eftir til að gera alvarlega atlögu að Williams bíl Ralfs. Að keppninni lokinni mátti sjá bros læðast yfir varir Michael Schumacher en honum hefur gengið miður í síðustu tveimur keppnum. "Það sem gerði þetta forvitnilegra var óvissan um brautina vegna þess að tímatökurnar og keppnin fóru fram sama daginn. Við höfðum enga hugmynd um hvernig andstæðingar okkar hygðust bregðast við aðstæðum og við urðum að vinna okkar eigið skipulag öðruvísi en við höfum alltaf gert. Það setti strik í reikninginn en við vissum að með góðri byrjun þá ætti allt að ganga eftir:"