Ósáttir við Bandaríkjamenn

Bandarískir embættismenn kunna að hafa eyðilagt fyrir baráttunni gegn hryðjuverkamönnum með því að ljóstra því upp við blaðamenn að al-Kaídaliðinn Muhammad Naeem Noor Khan hafi verið handtekinn. Þetta hafa fréttamenn CNN eftir pakistönskum leyniþjónustumönnum. Pakistanskir leyniþjónustumenn notuðu Khan eftir að hann var handtekinn til að afla upplýsinga um og hafa uppi á al-Kaídaliðum víða um heim. Khan er tölvusérfræðingur og segja embættismenn að hann hafi hjálpað Osama bin Laden við að eiga samskipti við undirmenn sína. Því litu Pakistanar svo á að Khan gæti reynst mikilvægur í viðleitni þeirra við að handtaka al-Kaídaliða. Pakistönsku leyniþjónustumennirnir óttast hins vegar að uppljóstranir bandarískra embættismanna verði til að þeir hafi ekki frekari not af Khan. Bandarískir embættismenn greindu frá handtöku Khans eftir að varúðarstig vegna hættu á hryðjuverkum var hækkað í Bandaríkjunum. Þeir sögðu handtökuna eina af ástæðunum fyrir því að ástæða þótti til að auka varnarviðbúnað. Fjöldi al-Kaídaliða hefur verið handtekinn að undanförnu. Þeirra á meðal er Qari Saifullah Akhtar, háttsettur foringi í al-Kaída, sem hefur skipulagt tvö tilræði við Pervez Musharraf, forseta Pakistans. Í Hvíta húsinu telja menn hins vegar að síðasta vika hafi skilað miklum árangri í baráttunni gegn hryðjuverkum. Embættismenn sögðu í viðtölum að handtökur al-Kaídaliða og upplýsingaöflun hefðu orðið til að grafa undan tilraunum hryðjuverkamanna til að ráðast á Bandaríkin. "Ég tel víst að aðgerðir okkar nú hafi truflað þá," sagði Frances Fragos Townsend, ráðgjafi Bandaríkjaforseta í heimavarnarmálum, í viðtali á Fox-sjónvarpsstöðinni. "Spurningin er: Höfum við truflað alla starfsemina eða hluta af henni? Og við vinnum að því með rannsóknum að komast að því hvort sé raunin," sagði hann.