Bretar handtaka fleiri

Bretar handtóku í dag þrettánda manninn sem grunaður er um aðild að hryðjuverkasamtökunum AL-Kaída. Maðurinn er grunaður um að hafa verið að skipuleggja hryðjuverk í Bandaríkjunum. Handtakan kom í kjölfar handtökuskipunar frá Bandaríkjunum en maðurinn, Babar Ahmad sem er þrjátíu ára gamall, er grunaður um að hafa stundað fjáröflun fyrir hryðjuverk í Tsjetsjeníu og Afganistan frá 1998 til 2003. Í fórum Ahmads fundust ýmsar leynilegar upplýsingar um herdeildir sjóhers Bandaríkjanna. Hann er grunaður um að hafa verið að skipuleggja hryðjuverk í Bandaríkjunum. Ahmed verður líklega framseldur til Bandaríkjanna. Annar mikilvægur maður er í haldi Breta, Esa al-Hindi og mun hann hafa verið háttsettur innan Al-Kaída. Al-Hindi er grunaður um að hafa komið að áætlunum í tengslum við árásir á fjármálastofnanir í Bandaríkjunum. Talið er að upplýsingarnar um mennina hafi að mestu leyti komið frá Pakistan eftir að eftirlýstur hryðjuverkamaður, Mohammad Naeem Noor Khan, var hnepptur í fangelsi í júlí síðastliðinum. Þar kom í ljós að hryðjuverkamenn áformuðu einnig að gera árásir á Heathrow-flugvöll í London. Lögreglan í Pakistan leyfði Khan að vera áfram í tölvupóstssambandi við samráðsmenn sína og þannig á lögreglan í Pakistan að hafa komist á snoðir um hóp hryðjuverkamanna í Bretlandi sem væri að skipuleggja árásir í Bretlandi og í Bandaríkjunum. Á myndinni er einum ættingja Babars Ahmads fylgt út úr dómshúsi í Lundúnum í dag þar sem Ahmad var úrskurðaður í gæsluvarðhald.