Stöðugir bardagar í Írak

Einn bandarískur hermaður lést og 15 særðust í árásum uppreisnarmanna í Bagdad í Írak í gærkvöldi. Hermenn berjast nú við árásarmenn á nokkrum stöðum í Írak og ekkert lát er á árásum. Í gærmorgun, í nótt og nú frameftir morgni hafa staðið yfir hörðustu bardagar í borginni Najaf frá því Bandaríkjaher yfirbugaði her Saddams Husseins árið 2003. Á sama tíma og hermenn börðust á götum Najaf brutust út átök í fjórum öðrum borgum. Í borginni Basra, þar sem breski herinn er staðsettur, létust tveir skæruliðar í skotbardaga. Í Bagdad hafa 19 Írakar látist og yfir hundrað eru særðir. Ástandið í Mósúl og Nassiriya hefur verið einnig verið mjög slæmt síðustu daga og raunar vikur. Í gær lést einn bandarískur hermaður og fimmtán særðust í árás skæruliða í Bagdad í sex stunda árásarhrinu. Uppreisnarmenn í Najaf kenna reyndar hermönnum um átökin og segja þá hafa átt upptökin. Fylgismenn Moqtada al-Sadir hafa haldið úti verstu árásunum en aðstoðarmenn Moqtada vilja nú koma á vopnahléi og hafa beðið um aðstoð Sameinðu þjóðanna til að koma á viðræðum við Bandaríkjaher. Í Bagdad var Bandaríkjamönnum gert að hafa ráðist á mosku og árásir með sprengjuvörpum særðu átta óbreytta borgara, þar á meðal eitt barn alvarlega. Ekki er vitað hver skaut úr sprengjuvörpunum á fólkið. Nýjar fréttir frá Írak segja frá enn einu mannráninu. Líbanskir embættismenn hafa staðfest að fjórum líbönskum bílstjórum hafi verið rænt.