Hryðjuverkárás á Heathrow í bígerð

Hryðjuverkamenn ætluðu að gera árás á Heathrow-flugvöll við London samkvæmt upplýsingum frá pakistönsku leyniþjónustunni. Nýjar upplýsingar gefa einnig til kynna að Al-Kaída ætli að gera árásir á flutningaskip. Misvísandi upplýsingar berast enn í tengslum við handtökurnar á meintum hryðjuverkamönnum í Bretlandi síðustu daga. Upphaflega voru mennirnir þrettán en einum var sleppt úr haldi. Tólf menn sitja enn í haldi og er talið að einn þeirra sé háttsettur meðlimur úr hryðjuverkasamtökunum Al-Kaída. Annar háttsettur meðlimur úr samtökunum, Naeem Noor Khan, var handtekinn í Pakistan í byrjun júlí. Hann er tölvunarfræðingur og upplýsingar sem náðust úr tölvunum hans gefa til kynna að Khan hafi átt þátt í að undirbúa árásir á Heathrow- flugvöll í London. Upplýsingar um mennina tólf í Bretlandi fundust í gögnum Khans að sögn talsmanna leyniþjónustu Pakistans. Mennirnir tóku líklega þátt í að undirbúa árás á flugvöllinn en tölvupóstur hafði gengið á milli Khans og einhverra manna í hópnum. Nýjar upplýsingar benda til að Al-Kaída hafi einnig ætlað að gera árás á flutningaskip til að trufla eða hafa neikvæð áhrif á heimsverslun. Að sögn talsmanns breska sjóhersins er talin mikil hætta stafa af mögulegum árásum á skip en engar frekari upplýsingar fengust um það hvort árásahættan væri bundin við bresk skip. Meðfylgjandi mynd er af Naeem Noor Khan.