Fangar struku í Svíþjóð

Þrír menn struku úr fangelsi í grennd við Stokkhólm í Svíþjóð með aðstoð grímuklæddra manna sem báru skotvopn. Þetta er í annað skiptið á rúmri viku sem fangar strjúka úr sænsku fangelsi. Samkvæmt upplýsingum frá lögreglu keyrðu grímuklæddu mennirnir sendiferðabíl í gegnum fangelsishliðið og flúðu síðan ásamt föngunum í annan bíl sem keyrði af af vettvangi. Engum skotum var hleypt af og hvorki fangaverðir né fangar slösuðust. Lögreglan leitar nú mannanna í grennd við fangelsið með aðstoð þyrlu, báta og hunda, en það lá ekki ljóst fyrir hvaða fangar það voru sem struku þegar leitin hófst.