Drap einn og særði 5 í Noregi

Víðtæk leit stendur enn yfir að manni sem stakk einn mann til bana og særði fimm í sporvagni í Osló í Noregi síðdegis í gær. Maðurinn sem lést var tuttugu og þriggja ára en meðal hinna særðu er tveir lífshættulega slasaðir, kona á fertugsaldri og rúmlega fimmtugur karlmaður. Haft er eftir lögreglunni í Osló, í norska dagblaðinu Aftenposten í dag, að fingraför sem fundist hafi á hnífnum og í lestinni geti gefið upplýsingar um árásarmanninn en þau verða borin saman við fingrafarasafn lögreglunnar í dag. Maðurinn er sagður vera milli 40 og 45 ára gamall og af afrískum uppruna, hugsanlega frá Sómalíu. Atvikið átti sér stað nærri Bislet stöðinni í Osló en maðurinn stökk svo úr sporvagninum og rændi bíl sem fannst síðar yfirgefinn við Solli-torg.