Namibísk svikamylla

Efnahagsbrotadeild namibísku lögreglunnar vinnur nú að því að reyna að leysa umfangsmikið fjársvikamál, sem teygir anga sína til Íslands. Meira en 40 karlar og konur frá Namibíu eru flækt í málið, en þau lögðu verulegar fjárhæðir inn á bankareikning, sem tryggingu fyrir störf á Íslandi, í Alaska, Noregi, og á Grænlandi. Peningarnir eru aftur á móti horfnir og ekkert af fólkinu hefur fengið þau störf, sem þeim var lofað. Að sögn namibísku lögreglunnar komu útlendingar til Namibíu í mars síðastliðnum og fengu fjölda manna til þess að greiða sér háar fjárhæðir, gegn loforði um starf við fiskvinnslu í Evrópu. Var það sett sem skilyrði fyrir vinnunni, að greiða fyrst tryggingu inn á ákveðinn reikning, en nú hefur komið í ljós að ekkert var að marka útlendingana, þar sem þeir stungu af með peningana.