Mikið mannfall í Falluja

Þrettán Írakar létust og fjórtán til viðbótar særðust í Falluja í fyrrinótt þegar kom til harðra bardaga á milli bandarískra hermanna og íraskra uppreisnarmanna. Að sögn bandarískra hermálayfirvalda hófust bardagarnir þegar ráðist var á eftirlitssveit íraskra og bandarískra hermanna. Skotið var að þeim úr sprengjuvörpum og vélbyssum. Því var svarað með skriðdrekum og loftárásás á hús sem uppreisnarmennirnir höfðu leitað skjóls í. Á annan tug verkstæða og tvö önnur hús eyðilögðust í bardögunum. Bandaríkjamenn segjast ekki hafa orðið fyrir neinu mannfalli. Læknir á sjúkrahúsi í Falluja sagði að þrettán lík hefðu borist þangað. Hann hafði þó þann fyrirvara á að sum líkanna hefðu farið svo illa í sprengingum að óhægt væri um vik að fullyrða hversu margir nákvæmlega hefðu látist. Harðir bardagar geysuðu í Falluja þar til fyrir tveimur mánuðum þegar samkomulag náðist um að Írakar tækju við stjórn bæjarins. Síðan hefur að mestu verið rólegt í borginni ef undan eru skildar loftárásir Bandaríkjamanna á meint aðsetur uppreisnarmanna.