Mega halda kjarnorkuvopnunum

Bandaríkjamenn hafa fullvissað Ísraela um að ekki verði hróflað við kjarnorkuvopnum þeirra þó reynt verði að koma í veg fyrir að önnur ríki í Miðausturlöndum komi sér upp slíkum vopnum. Þetta lásu menn úr orðum Ariels Sharons, forsætisráðherra Ísraels, á fundi Likudbandalagsins. Sharon sagði Bandaríkjamenn skilja að mikil ógn steðjaði að Ísrael sem yrði að geta varið sig. "Við höfum fengið skýr skilaboð Bandaríkjamana um að ekki eigi að snerta við Ísrael þegar kemur að fælingarmætti þess," sagði Sharon. Ísraelar hafa aldrei viðurkennt að ráða yfir kjarnorkuvopnum en fáir eru í vafa um að sú sé raunin.