Goðið skrifaði á gítarinn

Margir úr hinum átján þúsund manna hópi, sem sótti Metallica tónleikana, hafa sjálfsagt viljað hitta meðlimi hljómsveitarinnar og eiga með þeim stund. Þannig kom lítið á óvart að hótelið, sem þeir gistu á, var umvafið aðdáendum nánast allan sólarhringinn eftir að sagan spurðist út. Ekki voru allir jafn heppnir og þeir sem freistuðu gæfunnar á heimasíðu aðdáendaklúbbs hljómsveitarinnar og skráðu sig í pott þar sem hægt var að vinna baksviðspassa til að hitta goðin augliti til auglitis. Um 20 manns voru svo heppnir að hreppa eitt stykki passa og ljóst að færri komust að en vildu. Á meðal þeirra var Adam Bauer, ungur Metallica-unnandi sem að greip með sér gítar til áritunar. Adam var að sjálfsögðu hæstánægður með að hitta goðin. "Þetta var alveg frábært," sagði Adam. "Þeir árituðu allir gítarinn og tóku nett spjall. Kirk ýtti aðeins of fast á pennann þannig að það lak smá blek út. Það gerði þetta bara meira sérstakt".   Adam segist lengi hafa beðið eftir að vera viðstaddur tónleika Metallica og það hafi verið draumi líkast að fara á tónleika með þeim, hvað þá að hitta þá í eigin persónu. "Að fara baksviðs toppaði allt!" sagði Adam að lokum.