Ekki bara hestar og lopapeysur

Þeir farþegar Iceland Express sem hafa gleymt að taka með sér bókina í vélina og svo gripið í tómt þegar þeir þreifuðu eftir lesefni í sætisvasanum á móti sér eiga von á bragabót. Í ágúst verður þar nefnilega að finna nýtt tímarit, Iceland Express Inflight Magazine, sem svipar til Atlantica og Ský sem er að finna í vélum Icelandair og Flugfélagi Íslands. Snæfríður Ingadóttir, fyrrum ritstjórnarfulltrúi Mannlífs, hefur verið ráðin til þess að ritstýra því. "Þetta tímarit verður bæði á íslensku og ensku því farþegar flugfélagsins eru bæði Íslendingar og útlendingar," segir Snæfríður. "Þar sem félagið flýgur til London og Kaupmannahafnar verður mikið efni tengt þessum borgum sem og Reykjavík. Það sem hentar fyrir erlendu ferðamennina verður á ensku en efnið fyrir íslensku ferðamennina verður á íslensku." Snæfríður segir það hugsanlegt að einhverjar greinar verði á báðum tungumálum, séu þar um viðtöl eða annað efni að ræða sem höfði jafnt til Íslendinga sem erlendra ferðamanna. Blaðið á svo að vera bæði fræðandi og skemmtilegt. "Þetta verður ekki bara hestar og lopapeysur," segir Snæfríður. Vinnsla fyrsta blaðsins er að hefjast og er Snæfríður því búin að pakka niður í ferðatösku, þar sem hún flýgur út á næstunni í "rannsóknarleiðangur" til Kaupmannahafnar og London. "Nú verður sumarið ekkert smá skemmtilegt hjá mér. Ég verð mikið á ferðinni, bæði innanlands og utan, í leit að skemmtilegu efni í blaðið. Þetta er örugglega með skemmtilegri vinnum sem maður getur komist í," segir Snæfríður að lokum og það er auðséð að hún er spennt fyrir þeim ævintýrum sem bíða.