Verðum að græða sárin
"Við getum ekki unnið þessar kosningar," sagði John Kerry öldungadeildarþingmaður þegar hann viðurkenndi ósigur sinn í bandarísku forsetakosningunum í gær. Hann lagði áherslu á að hefjast þyrfti handa við að sætta landsmenn eftir þær deilur sem hafa klofið þá undanfarin misseri. "Við töluðum um hættuna á klofningi þjóðar okkar og þörfina, brýna þörf, fyrir einingu, að finna sameiginlegan grundvöll til að taka höndum saman," sagði Kerry. "Ég vona að við getum byrjað að græða sárin." Kerry neitaði að viðurkenna ósigur í fyrrinótt meðan hann og aðrir demókratar töldu enn möguleika á sigri í Ohio. Síðdegis í gær hringdi hann hins vegar í George W. Bush, viðurkenndi ósigur sinn og óskaði honum til hamingju.
