13 skæruliðar létust í Írak

Þrettán írakskir skæruliðar létust í bardögum við varnarliðsmenn og bandaríska hermenn rétt utan við borgina Bakúba í morgun. Hópur skæruliða réðst til atlögu að írökskum þjóðvarnarliðsmönnum með sprengjuvörpum og handsprengjum, þar sem þeir aðstoðuðu bandaríska hermenn við leit í búðum skæruliða, í Buhriz sem er um 5 km suður af Bakúba. Þjóðvarnarliðar og bandarískir hermenn svöruðu skotárásunum með því að skjóta úr sprengjuvörpum á skæruliðana og drápu þrettán þeirra. Hersveitir fundu mikið magn af vopnum í búðum skæruliðanna, m.a. sprengjuvörpur, handsprengjur og skotfæri. Ekkert mannfall varð meðal varnarliðsmanna eða hermanna að sögn Bandaríkjahers. Þetta er ekki í fyrsta sinn sem harðir bardagar geisa á milli hersveita og skæruliða í Bahriz, einu af höfuðvígjum fyrrverandi forseta Íraks, Saddams Husseins. Vígamenn drápu einnig fyrrverandi liðsforingja í her Saddams og sonar hans í suðurhluta Bagdad í morgun. Maðurinn, sem er fyrrverandi yfirmaður á Nahya svæðinu í Bagdad, var að keyra í bíl sínum þegar vígamenn keyrðu upp að hlið honum og hófu skothríð.