Norðmenn afhendi ekki Nóbelinn

Ungliðahreyfing norska miðflokksins, Senterpartiet, hefur látið þá skoðun í ljós að Norðmenn eigi ekki lengur skilið þá virðingu og þann heiður sem fylgir því að veita friðarverðlaun Nóbels. Ástæðan sé fylgispektin við ofbeldisfulla utatnríkisstefnu Bandaríkjastjórnar. Ungliðarnir vilja að þessi heiður hlotnist Íslendingum í staðinn, þeir séu lítil og friðsöm þjóð og láti ekki alltaf undan öllum tilmælum sem berist frá Washington. Formaður ungra miðjumanna í Noregi segir að Norðmenn hafi í næstum hundrað ár verið í fylkingarbrjósti þeirra þjóða sem stuðlað hafi að friði í heiminum, en þessu hafi Bondevik-stjórnin breytt með hernaðarbrölti sínu í Serbíu og Írak. Frá þessu segir í Dagsavisen. Myndin er af Nelson Mandela sem fékk friðarverðlaun Nóbels árið 1993.