Will Smith stöðvar Spider-Man

Vísindaspennumyndin I, Robot með Will Smith í aðalhlutverki fór vel af stað í Bandaríkjunum um helgina en hún halaði inn 53.3 milljónir dollara á frumsýningarhelgini og batt þar með enda á tveggja vikna sigurgöngu Spider-Man 2 sem aðsóknarmesta myndin vestanhafs. Viðtökurnar við I, Robot voru mun betri en framleiðendur hennar höfðu þorað að vona en þeir hefðu verið sáttir ef hún hefði náð 40 milljónum fyrstu 3 sýningardagana. Standist miðasölutölur helgarinnar er I, Robot stærsta frumsýningarmynd Wills Smith en Men in Black II rakaði saman 52.2 miljónum helgina sem hún var frumsýnd árið 2002. "Það er ákveðinn kuldi gagnvart vísindaskáldsögunum," segir Bruce Snyder yfirmaður hjá Fox sem framleiðir myndina. "Will Smith kemur hins vegar með þann hita sem þarf til að laða kvenfólkið að og aðsóknin um helgina skiptist nokkuð jafnt á milli karla og kvenna." I, Robot byggir lauslega á skáldsögu eftir Isaac Asimov og gerist árið 2035 þegar vélmenni eru orðin hluti af daglegu lífi fólks. Sambúð manna og véla er friðsamlega þar til grunur um morð fellur á eitt þeirra. Spider-Man 2 varð að víkja niður í annað sætið á aðsóknarlistanum um helgina en myndin skilaði 24.2 milljónum dollara í kassann frá föstudegi til sunnudags. Hún hefur því skilað 301.7 milljónum dollara fyrstu 19 sýningardagana en það tók fyrstu Spider-Man myndina 22 daga að ná 300 milljón dollara markinu. Það þykir þó enn of snemmt að segja til um hvort nýja myndin nái 403 milljón dollara markinu sem Spider-Man náði árið 2002.