Brotthvarf rætt í skugga ofbeldis

Blóðsúthellingar í flóttamannabúðum á Gaza og mesta öryggisgæsla í sögu Ísraelsþing voru í algleymingi þegar Ariel Sharon forsætisráðherra tók til máls í ísraelska þinginu og hvatti þingmenn til að styðja áætlun sína um brotthvarf ísraelskra hermanna og landtökumanna frá Gaza. Fjórtán Palestínumenn lágu í valnum eftir að ísraelskar hersveitir ruddu sér leið inn í Khan Younis flóttamannabúðirnar á Gaza til að binda endi á skothríð úr sprengjuvörpum Palestínumanna. 72 til viðbótar særðust í árás Ísraelshers sem hófst í fyrrinótt og stóð fram á dag í gær. Ísraelar notuðu skriðdreka og herflugvélar í árásinni. Meðal þeirra Palestínumanna sem létust voru þrír meðlimir palestínskra öryggissveita, tveir vígamenn og ellefu ára piltur. Sautján þeirra sem særðust voru undir átján ára aldri. Tveir ísraelskir hermenn særðust þegar eldflaug var skotið á farartæki þeirra. Mörg þúsund lögreglumenn voru á vakt í Jerúsalem til að tryggja að allt færi vel fram þegar ísraelska þingið kom saman til að ræða áætlun Sharon um brotthvarf frá Gaza. Hart var deilt um áætlunina í gær en stefnt er að því að greiða atkvæði um hana í kvöld. Sharon fékk lítinn frið til að flytja ræðu sína. Þingmenn sem eru andvígir ályktuninni voru með frammíköll og leiddi það meðal annars til þess að Effi Eitam, formaður Trúarleg þjóðarflokksins var rekinn úr þingsalnum eftir innan við stundarfjórðung fyrir stöðug frammíköll. "Þið eruð dásamlegt fólk en þið hafið einn veikleika - Messíasarduld hefur þróast með ykkur," sagði Sharon og gerði orð Menachem Begin, forvera síns, að sínum eigin þegar hann fjallaði um landtökumenn í Gaza sem hafa barist af krafti gegn áætlun hans. Hann rifjaði upp baráttu sína fyrir eflingu landnemabyggða en sagði nauðsynlegt að hverfa frá Gaza til að tryggja betur öryggi Ísraels. Shimon Peres, leiðtogi stærsta stjórnarandstöðuflokksins, sagði að með því að hverfa frá Gaza væru Ísraelar að losa sig við ýmsar hættur sem að þeim steðjuðu.