Æfir út í eiginkonu Arafats

Leiðtogar Palestínumanna eru æfir út í eiginkonu Jassers Arafats fyrir að saka þá um að ætla að grafa hann lifandi, eins og hún orðaði það. Suha Arafat sagði að leiðtogar heimastjórnarinnar væru á leið til Parísar til þess að fá franska lækna til að slökkva á öndunarvélinni sem heldur honum á lífi.  Palestínumönnum hefur frá upphafi verið í nöp við Suhu sem hefur búið í París undanfarin fjögur ár í vellystingum pragtuglega. Hafin er rannsókn á rúmlega ellefu milljónum dollara sem hafa verið lagðir inn á reikning hennar í frönskum banka. Hún neitar því að eitthvað sé athugavert við þessa peninga og segir að ekkert sé eðlilegra en að forseti Palestínu sendi peninga til fjölskyldu sinnar og eiginkonu, sem sinni hagsmunamálum Palestínumanna erlendis. Þau Suha og Arafat eiga eina dóttur sem er níu ára gömul. Suha er fjörutíu og eins árs en Arafat sjötíu og fimm ára.