Kransar úr 3000 ára gömlum trjám

Sigurvegarar í maraþonhlaupi karla og kvenna á Ólympíuleikunum í Aþenu sem hefjast á föstudaginn munu fá kransa sem búnir eru til úr greinum elstu olívutrjáa Grikklands. Um er að ræða tvö tré, hvort í sínu þorpinu á grísku eyjunni Krít, sem sögð eru meira en 3000 ára gömul. Íbúar beggja þorpanna halda því fram að sitt tré sé eldra en forsvarsmenn Ólympíuleikanna treysta sér ekki til að skera úr um hið rétta. Hvorugt þorpið gefur leyfi fyrir því, skiljanlega, að tréið verði hoggið svo unnt sé að telja árhringina og því verða greinar beggja trjánna notaðar í kransana.