Kenna tóma vitleysu

Ríki Bandaríkjanna eru 53 talsins en fáninn "hefur ekki verið uppfærður til að taka tillit til þriggja síðustu ríkjanna - Hawai, Alaska og Púerto Ríkó". Seinni heimsstyrjöld hófst 1938 og henni lauk fjórum árum síðar. Þingið skiptist í tvennt, öldungadeildina og fulltrúadeildina, önnur er fyrir demókrata en hin fyrir repúblikana. Þetta er meðal þess sem spænskumælandi innflytjendum hefur verið kennt í California Alternative High School, einkareknum skóla hvers stjórnendur segjast útskrifa fólk með námsgráðu sem auðveldar fólki að komast inn í framhaldsskóla, fá betri störf og fjárhagsaðstoð. Ekkert af þessu stenst. Ríki Bandaríkjanna eru 50 og Púerto Ríkó hefur aldrei verið í þeirra tölu. Seinni heimsstyrjöld hófst 1939 og henni lauk 1945. Þingið skiptist vissulega í tvennt en demókratar og repúblikanar sitja saman í báðum deildum þess. Að auki hefur skólinn ekki leyfi til að gefa út námsgráður. Yfirvöld í Kaliforníu hafa nú stefnt skólanum og fengið eignir hans frystar. Þá hefur þess verið krafist að skólinn endurgreiði skólagjöld sín og greiði fyrrum nemendum sínum bætur.