Arafat sagður bera mesta ábyrgð

"Arafat ber stærstan hluta ábyrgðarinnar á mistökunum. Arafat forseta mistókst og palestínsku stjórninni mistókst. Palestínsku stjórnmálahreyfingunum hefur mistekist," sagði þingmaðurinn og ráðherrann Qadoura Fares um þá stöðu sem komin er upp í palestínskum stjórnmálum. Deilan um stjórn öryggismála í Palestínu virðist engan enda ætla að taka og frekar er útlit fyrir að hún versni heldur en hitt. Palestínska þingið brá út af venju sinni og gagnrýndi Jasser Arafat forseta. Þingið samþykkt ályktun þar sem það gekk gegn vilja hans og lagði til að hann samþykkti afsagnarbeiðni Ahmed Qureia forsætisráðherra. Það hefur hann neitað að gera hingað til. Þingið lagði einnig að Arafat að skipa nýja stjórn sem væri betur til þess fallin að fara með völd en stjórn Qureia. Gagnrýnt hefur verið að Arafat hafi ekki gefið ríkisstjórnum landsins tækifæri til að stjórna þar sem hann hefur neitað þeim um að fara með stjórn löggæslumála. Átökin eru ekki einskorðuð við Gaza þó upphaf átakanna megi rekja þangað. Palestínskum embættismanni var rænt á Vesturbakkanum en sleppt nokkru síðar. Fram að þessu höfðu mannrán og uppþot takmarkast við Gazasvæðið. Khaled Mashaal, leiðtogi Hamas sem er búsettur í Sýrlandi, setti sig í samband við Arafat í gær og lagði hart að honum að koma á friði á Gaza. Símtalið þykir til marks um þann óróleika sem hefur gripið um sig vegna deilna síðustu daga. Ef símtal Mashaal er undanskilið hefur Hamas haldið sig til hlés meðan fylkingar í Fatahhreyfingu Arafats hafa deilt og átt í bardögum innbyrðis. Enn hefur ekkert skýrst um hverjar verða lyktir deilu Arafats og Qureia. Arafat neitar að taka afsögn Qureia gilda en Qureia kveðst aðeins gegna starfi forsætisráðherra þar til annar hefur verið skipaður í hans stað.