Norsku síamstvíburarnir dánir

Síamstvíburar sem fæddust á sjúkrahúsi í Fredrikstad í Noregi á þriðjudag létust rétt fyrir hádegi í dag, á barnadeild Ríkisspítalans í Osló, þangað sem þær voru fluttar fljótlega eftir fæðingu. Stúlkurnar voru með samvaxið hjarta sem starfaði ekki eðlilega en þær höfðu hvor sín lungu og höfuð. Á vef Aftenposten kemur fram að læknar og foreldrar hafi verið sammála um að það hefði verið of áhættusamt að aðskilja stúlkurnar. Litlar líkur voru á að önnur þeirra eða þær báðar hefðu lifað slíka aðgerð af. Síamstvíburar fæddust síðast í Noregi árið 1980 og voru þær stúlkur aðskildar í vel heppnaðri aðgerð.