Falsaði eigin aftöku

Tuttugu og tveggja ára Bandaríkjamaður falsaði myndband sem sýndi hann hálshöggvinn af mannræningjum í Írak. Sjálfur segist hann hafa notað gerviblóð og að um grikk hafi verið að ræða. Írakska bráðabirgðastjórnin hefur lokað útibúi arabískrar sjónvarpsstöðvar, vegna birtinga slíkra myndbanda. Í morgun birtist myndband á vefsíðu hryðjuverkahóps Jórdanans al-Zarqawis, sem tengjast al-Qaeda samtökunum. Á myndbandinu gefur ungur Bandaríkjamaður upp nafn sitt og heimilisfang og hvetur til þess að Bandaríkjamenn yfirgefi Írak. Maðurinn sem heitir, Benjamin Vaterford náði því markmiði sýnu að gabba fjölmiðla. Hann greindi sjálfur frá því fljótlega að myndbandið væri falsað og að hann hefði notað gerviblóð og myndir af vefsíðum hryðjuverkasamtaka. Í fyrstu fréttum af myndbandinu kom fram að ólíkt fyrri myndböndum var gíslinn ekki klæddur í appelsínugulan fangagalla og ekki sást í fána hrðyjuverkasamtakanna. Vaterford sagði í dag að markmiðið hefði verið að sjá hve fljótt fjölmiðlar létu blekkjast. Hann sagðist hafa vitað að fjölmiðlar myndu telja myndbandið ósvikið þrátt fyrir að það bæri öll ummerki fölsunar. Írakska bráðabirgðastjórnin fyrirskipaði arabísku sjónvarpsstöðinni al-Jazeera að loka útibúi sínu í Bagdad í mánuð, þar sem stöðin hvetji mannræningja til dáða með því að birta myndbönd frá þeim. Al-Jazeera er með höfuðstöðvar sínar í Qatar og hyggst áfram flytja fréttir frá Írak, þrátt fyrir að útibúinu í Bagdad verði lokað. Þar á bæ eru menn mjög ósáttir við að írakska bráðabyrgðastjórnin sé að brjóta loforð um að tjáningarfrelsi verði virt og frelsi fjölmiðla til að veita upplýsingar.