Fékk skilnað frá föður sínum

Fjórtán ára gamall drengur fékk löglegan skilnað frá föður sínum í Massachusetts í Bandaríkjunum í gær. Þetta er fyrsta mál sinnar tegundar í Bandaríkjunum. Eins og greint var frá í gær fór Patrick Holland fram á skilnað við föður sinn sem drap móður hans fyrir sex árum á hrottafenginn hátt. Faðirinn, Daniel Holland sem er 36 ára gamall og situr í lífstíðarfangelsi fyrir morðið, fór fram á að fylgjast með syni sínum í skólanum og hefur hann haft aðgang að öllum opinberum skrám um son sinn. Patrick býr hjá vinafólki móður sinnar sem hefur forræðisrétt fyrir honum. Patrick er fyrsti unglingurinn sem fer fram á að fá algjöran skilnað frá foreldri sínu. Howard Davidson, talsmaður lögmannafélags Bandaríkjanna og sérfræðingur í barnalögum, segir að ekki hafi verið neitt fordæmi fyrir slíku en að vilji og áræðni Patricks hafi ef til vill hvött önnur börn í sömu stöðu til að leita réttar síns, sér í lagi þar sem annað foreldrið er drepið af hinu foreldrinu. Daniel Holland braust inn á heimili fyrrverandi konu sinnar, skaut hana sex sinnum og barði svo með byssu sinni. Patrick kom að móður sinni daginn eftir. Faðirinn var viðstaddur réttarhöldin en var gert að fara út þegar Patrick fór í vitnastól. Eftir að dómur var kveðinn upp, Patrick í hag, bað faðir hans dómara um að fá að tala við son sinn til að segja honum að honum þætti vænt um hann. Patrick fór þá út úr réttarsálnum og úrskurðaði dómari að Daniel fengi ekki að tala við son sinn. Drengurinn sagði við blaðamenn eftir á að þungu fargi væri af sér létt.