Allawi heimsótti Najaf

Iyad Allawi, forsætisráðherra bráðabirgðastjórnarinnar í Írak, hvatti skæruliða til að hætta bardögum í borginni Najaf, í heimsókn sinni þangað í morgun. Hann segist ekki ætla að handtaka leiðtoga uppreisnarmannanna, en að engar samningaviðræður geti farið fram fyrr en vopn verði lögð niður. Harðir bardagar hafa geisað milli liðsmanna shítaklerksins Moqtada al-Sadrs og bandaríska hersins í Najaf frá því á fimmtudag, og hafa hundruð manna fallið eða særst. Írakski forsætisráðherrann hefur verið harðorður í garð uppreisnarmanna, en hann sagði í gær að þeir væru glæpamenn sem skýldu sér bakvið nafn al-Sadrs. Gríðarleg öryggisgæsla var í Najaf, vegna heimsóknar Allawi og annarra ráðherra úr ráðuneytum innanríkis- og varnarmála. Heimsóknin var hins vegar stutt en ráðherrarnir áttu klukkustundar langan fund með borgarstjóra Najaf, Adnan al-Zurufi. Fljótlega eftir að sendinefnd bráðabirgðastjórnarinnar fór frá borginni brutust út átök í um kílómetra fjarlægð frá skrifstofu borgarstjórans, milli lögreglu og vígamanna úr röðum al-Sadrs.