Miðasala á Ólympíuleika tekur kipp

Miðasala á Ólympíuleikana hefur tekið kipp eftir rólega byrjun og standa nú þúsundir Grikkja í nokkurra klukkutíma biðröðum í Aþenu. Búist hafði verið við að miðasala myndi ganga betur í Grikklandi en í Sidney í Ástralíu árið 2000, meðal annars vegna sögulegra tengsla Grikklands við Ólympíuleikana, en fyrstu nútíma leikarnir voru haldnir í Aþenu árið 1896. Vaxandi áhyggjur af öryggisgæslu og hvort Grikkjum tækist að klára allt í tæka tíð drógu úr sölu á alþjóða vísu. Nú er miðasala hins vegar að aukast dag frá degi og eru skipuleggjendur hæstánægðir, sérstaklega með söluna í Grikklandi. Í upphafi síðustu viku hafði selst minna en helmingur þeirra rúmlega fimm milljóna miða sem í boði eru. Síðustu þrjá daga hafa 150 þúsund miðar rokið út og eru skipuleggjendur bjartsýnir á að þeim takist að selja um þrjár og hálfa milljón miða áður en leikarnir hefjast á föstudaginn. Líkt og Íslendingar eru Grikkir þekktir fyrir að gera hlutina á síðustu stundu og verða miðar fáanlegir á fjórum stöðum til viðbótar við þá sem fyrir eru frá morgundeginum. Miðasala hefur einnig aukist í fjórum öðrum borgum en Aþenu, þar sem hluti leikanna fer fram. Uppselt er á opnunar- og lokaathöfnina, enn eru hins vegar fáanlegir miðar á flestar riðlakeppnir. Ólympíuleikarnir hefjast á föstudaginn og standa yfir til sunnudagsins 29. ágúst. Föstudagurinn þrettándi hræðir ekki skipuleggjendur opnunarhátíðarinnar sem segja að hún verði glæsilegri en nokkru sinni fyrr, en um 9000 manns munu koma að henni. Ríkissjónvarpið sýnir beint frá athöfninni klukkan korter í sex á föstudaginn en áætlað er að um 300 sjónvarpsstöðvar sýni um 35 þúsund klukkustundir af efni frá Ólympíuleikunum. Nærri fjórir milljarðar manna munu gjóa augum að sjónvarpsskjáum vegna leikanna.