Lífshlaup í 32 töktum

Klukkan 7.40 í gær frumflutti Quarashi nýtt lag í morgunþætti FM957. Það heitir Stun Gun og er fyrsta útvarpslagið af væntanlegri breiðskífu þeirra sem kemur út í september. "Þetta er eitt af þremur poppuðustu lögum plötunnar," fullyrðir Sölvi Blöndal, höfuðpaur og lagahöfundur. "Þarna mætir gamli Quarashi stíllinn þeim nýja. Egill fer gjörsamlega á kostum í rappinu og segir sterklega frá sínu lífshlaupi undanfarið í 32 töktum. Mér líður eins og ég hafi búið heima hjá honum undanfarin ár, bara af því að hafa unnið þessa plötu. Þetta eru mjög afgerandi textar, svo ekki sé meira sagt." Þetta verður fyrsta smáskífan af nýju plötunni. Mess it Up fær þó að fljóta með á plötunni sem aukalag á íslensku útgáfunni. Lagið Race City verður ekki með, og fær því hugsanlega aldrei formlega útgáfu. "Við viljum ekki hafa plötuna of langa. Sumt passar inn, annað ekki. Bítlarnir settu ekki öll smáskífulögin sín á plöturnar; ég ætla að herma eftir þeim. Race City var það fyrsta sem ég og Egill gerðum saman. Við höfum kynnst svo miklu betur og náð meiri samruna texta- og tónlistarlega séð. Platan verður að standa sem ein heild." Quarashi verður ein þeirra sveita sem hitar upp fyrir 50 Cent og harðjaxlanna í G-Unit. "Ég fílaði hann engan veginn til þess að byrja með, en datt inn í þetta smám saman. Hann er með níu kúlugöt á hálsinum, maður verður að gefa honum smá kredit fyrir það," segir Sölvi og hlær.