Erlent

Kabila ver ákvörðun sína um beita hernum

Joseph Kabila, forseti Kongó, hefur varið þá ákvörðun sína að beita hernum gegn vopnuðum fylgismönnum Jean-Pierre Bemba í síðustu viku. Að minnsta kosti 150 manns létu lífið í átökunum í höfuðborginni Kinshasa.

Stjórnvöld í Venesúela taka til sín land

Stjórnvöld í Venesúela hafa tekið til sín 330.000 hektara af landi til þess að geta dreift því aftur út samkvæmt hugmyndum Hugo Chavez, forseta landsins, en hann ætlar sér að gera miklar endurbætur á landbúnaði í Venesúela. Chavez sagðist hafa tekið til sín 16 býli sem að hefðu ekki skilað hagnaði.

Neitar að svara spurningum demókrata

Aðstoðarkona Alberto Gonzales, aðalsaksóknara Bandaríkjanna, neitaði í dag að bera vitni fyrir þingnefnd um brottrekstur átta alríkissaksóknara og skýldi sér á bak við fimmta viðauka bandarísku stjórnarskrárinnar. Sá viðauki kveður á um að vitni þurfi ekki að svara spurningum ef að svörin gætu leitt til eigin sakfellingar.

Bretar segjast geta sýnt fram á sakleysi sjóliða

Bretar sögðu í dag að þeir muni sanna að bresku sjóliðarnir, sem Íranar handtóku á föstudaginn, hafi verið á írösku hafsvæði þegar handtökurnar átti sér stað. Sannanirnar segjast þeir ætla að sýna ef sjóliðunum verður ekki sleppt fljótlega. Íranar hafa haldið því fram að hermennirnir hafi verið á írönsku hafsvæði og að þess vegna hafi þeir verið handteknir.

Sameinuðu þjóðirnar leggja til friðarráðstefnu Arabaríkja

Sameinuðu þjóðirnar hafa lagt til að Ísraelar, Palestínumenn og Arabaríkin taki sig saman og reyni að endurlífga friðarferlið í Mið-Austurlöndum. Condoleezza Rice, utanríkisráðherra Bandaríkjanna, er nú þar á ferðalagi sem og aðalritari Sameinuðu þjóðanna, Ban Ki-moon.

Fjöldamótmæli í Pakistan

Stjórnarandstæðingar í Pakistan mótmæltu í þúsundatali í víða um landið í dag og kröfðust afsagnar Pervez Musharraf, forseta landsins. Mótmælin voru friðsamleg en voru fámennari en skipuleggjendur höfðu vonast til.

Egyptar kjósa um bann við trúarlegum stjórnmálaflokkum

Rólegt var á kjörstöðum í Egyptalandi í dag en kosið var um breytingar á stjórnarskrá landsins. Allir helstu stjórnarandstöðuflokkar höfðu sagt fylgismönnum sínum að sniðganga þær þar sem þær banna trúarlega stjórnmálaflokka.

Fyrsti fanginn fyrir endurbættan herrétt

David Hicks, sem er fangi í Guantanamo fangelsi Bandaríkjamanna og ásakaður um að hafa barist gegn þeim í Afganistan, fór í dag fyrir herrétt Bandaríkjamanna. Hicks á yfir höfði sér lífstíðarfangelsi ef hann verður fundinn sekur. Hann hefur þegar eytt fimm árum í fangelsinu í Guantanamo. Hann er fyrsti fanginn sem fer fyrir hinn nýja dómstól sem notaður í málum gegn föngum í Guantanamo.

Tamíl-tígrar gerðu loftárás

Upplýsingafulltrúi norræna vopnahléseftirlitsins á Srí Lanka segir ekki of djúpt í árina tekið að segja landið ramba á barmi borgarastyrjaldar. Þrír týndu lífi og 16 særðust í loftárás Tamíl-tígra á herflugvöll í höfuðborginni Colombo. Loftárásin er sú fyrsta sem tígrarnir gera.

Sögulegt samkomulag í höfn

Sögulegt samkomulag tókst í dag um myndun heimastjórnar á Norður-Írlandi. Leiðtogar Sambandsflokksins og Sinn Fein sömdu um þetta á fundi í morgun en þar til þá höfðu þeir aldrei hist augliti til auglits.

Talibanar boða árásir á þýska hermenn

Einn af leiðtogum Talibana í Afganistan segir að þegar þeir hefja sókn sína í sumar muni þeir beina byssum sínum að þýskum hermönnum og hermönnum annarra þjóða sem hingaðtil hafa að mestu sloppið við áökt. Klerkurinn Obaidullah Akhund segir að sexþúsund ungir hermenn séu reiðubúnir að fórna sér fyrir Allah í komandi átökum.

Fjórir umhverfisráðherrar gegn Sellafield

Umhverfisráðherrar fjögurra landa hafa sent breskum stjórnvöldum beiðni um að opna ekki endurvinnslustöðina í Sellafield á nýjan leik. Umhverfisráðherrar Íslands, Noregs, Írlands og Austurríkis eru nú á fundi í Belfast, til að leggja áherslu á andstöðu sína við Sellafield. Stöðinni var lokað árið 2005 eftir innanhúss leka á mjög geislavirkum úrgangi.

Vill veita Kosovo sjálfstæði

Anna Nicole lést af of stórum lyfjaskammti

Á hraðri leið til...

Portúgölsk samtök sem berjast fyrir betri umferðarmenningu hafa skrifað páfa bréf þar sem þau biðja hann um sjá til þess að prestur nokkur sem á 150 hestafla Ford Fiesta, falli ekki í þá freistni að aka of hratt. Faðir Antonio Rodrigues er eini maðurinn í Portúgal sem á Ford Fiesta 2000 ST.

Ráku flóttamenn í sjóinn

Sögulegur aprílmánuður

Loftárás bætir við fleiri óvissuþáttum

Þrír týndu lífi og 16 særðust í loftárás Tamíl-tígra á herflugvöll nærri Colombo, höfuðborg Srí Lanka, í gærkvöldi. Þetta er í fyrsta sinn sem tígrarnir gera loftárás og segir upplýsingafulltrúi norræna vopnahléseftirlitsins þetta bæta við fleiri óvissuþáttum í landinu.

Sögulegt samkomulag á Norður-Írlandi

Ian Paisley leiðtogi Sambandsflokksins og Gerry Adams leiðtogi Sinn Fein hafa komist að samkomulagi um myndun heimastjórnar á Norður-Írlandi. Stjórnin tekur til starfa 8. maí. Þetta er sögulegt samkomulag en þar til í dag höfðu leiðtogar Sambandsflokksins og Sinn Fein aldrei fundað.

Erlendur námsmaður myrtur í Jemen

Erlendur námsmaður fórst og annar særðist þegar uppreisnarmenn sjíta gerðu árás á háskóla í norðurhluta Jemen í dag. Ekki hefur verið gefið upp hvaðan námsmaðurinn var en Reuters-fréttastofan segist hafa heimildir fyrir því að hann hafi verið franskur.

Vilja að sjóliðar verði látnir lausir

Utanríkisráðherra Íraks, Hoshiyar Zebari hafði í gærkvöldi samband við starfsbróður sinn í Íran og krafðist þess að hann léti lausa 15 breska sjóliða sem voru handteknir fyrir helgi, að því er Íranir segja í þeirra lögsögu. Bretar vilja hins vegar meina að sjóliðarnir hafi verið í írakskri lögsögu. Íranir hafa gefið út að líklega verði sjóliðarnir ákærðir og réttað yfir þeim í Íran. Tony Blair forsætisráðherra Bretlands hefur hins vegar sagt það óhæfu og krafist þess að sjóliðarnir yrðu látnir lausir.

Sarkozy hættir sem ráðherra

Nicolas Sarkozy, forsetaframbjóðandi hægrimanna í Frakklandi hættir í dag sem innanríkisráðherra landsins eins og tilkynnt hafði verið. Nú líður að kosningum í landinu en fyrri umferðin fer fram þann 22. apríl. Sarkozy mun einbeita sér að kosningabaráttu þangað til.

Paisley og Adams að ná samkomulagi

Ian Paisley og Gerry Adams leiðtogar Sambandsflokksins og Sinn Fein á Norður-Írlandi eru við það að komast að samkomulagi um myndun heimastjórnar í landinu. Þetta hefur Reuters-fréttastofan eftir heimildarmanni sínum. Ef af verður markar það þáttaskil í stjórnmálasögu Norður-Írlands.

Reyna að koma pandabirni til með myndbandi

Starfsmenn dýragarðs í Tælandi gerðu í dag tilraun með að sýna karlkyns pandabirni myndband af öðrum pandabjörnum að maka sig til þess að hvetja hann til að reyna að fjölga sér. Karlpandan, Chuang Chuang hefur þótt heldur latur við að reyna að makast við kvenkyns vinkonu sína Lin Hui. Yfirmaður dýragarðsins segir þess aðferð reynda til að koma Chuang til.

Kristjaníubúar ákveða sig á morgun

Kristjaníubúar ákveða á morgun hver framtíð fríríkisins verður. Þeir funduðu síðast í gær en þá tókst 650 íbúum ekki að koma sér saman um afstöðu gagnvart tilboði ríkisins um uppbyggingu á svæðinu. Kristjaníubúar hafa frest til 1. apríl að ákveða sig. Kaupmannahafnarborg vill byggja blokkir þar sem Kristjanía er nú en hefur boðið íbúum fríríkisins íbúðir í þeim. Einhver hús eiga meira að segja að fá að standa áfram. Það hafa helst verið eiturlyfjasalar í fríríkinu sem hafa staðið gegn tillögunum.

Bláber fyrirbyggja ristilkrabbamein

Bláber geta verkað fyrirbyggjandi á ristilkrabbamein. Þetta segja bandarískir vísindamenn. Berin innihalda náttúruleg andoxunarefni sem koma í veg fyrir að krabbamein þróist. Svipuð andoxunarefni finnast einnig í vínberjum. Vísindamennirnir, sem starfa við landbúnaðardeild Rutgers-háskóla í Bandaríkjunum segja jafnvel mögulegt að koma þessum andoxunarefnum fyrir í töflum. Þangað til mæla vísindamennirnir með því að fólk sé duglegra við að borða bláber.

Vill borga konum til að sleppa fóstureyðingum

Þingmaður repúblikana á ríkisþinginu í Texas hefur lagt til að konum verði boðnir 500 dollarar ef þær hætta við að fara í fóstureyðingu. Hann segir upphæðina til þess fallna að margar konur ákveði frekar að eiga börnin. 75 þúsund fóstureyðingar voru framkvæmdar í Texas á síðasta ári. Þingmaðurinn segir að ef 5 prósent þeirra kvenna sem annars færu í fóstureyðingu hætti við vegna peninganna séu það 3000 líf sem hægt væri að bjarga.

Paisley og Adams á sögulegum fundi

Í dag rennur út frestur sem héraðsþing Norður-Írlands hefur til að mynda heimastjórn. Formælendur stærstu flokka sambandssinna og aðskilnaðarsinna hittast í dag á sögulegum fundi til að reyna að mynda stjórn, annars fara stjórnvöld í London með völdin áfram líkt og undanfarin fjögur ár.

Eiturlyfjaprófa ungmenni fyrirvaralaust

Dómsmálaráðherra Svíþjóðar vill löggjöf sem veitir skólum leyfi til að senda börn undir 15 ára aldri í þvag- eða blóðprufu og eiturlyfjapróf fyrirvaralaust án samþykkis foreldra. Frumvarpið er til þess ætlað að stemma stigu við eiturlyfjamisnotkun ungra táninga og minnka ofbeldi í skólum.

Sérsmíðaðir sjúkrabílar fyrir offeita Ástrala

Offituvandinn í Ástralíu hefur nú orðið til þess að stjórnvöld hafa neyðst til að endurnýja sjúkrabílaflota sinn. Nýju bílarnir eru hannaðir með það að augnamiði að sjúklingarnir séu stærri um sig en áður hefur verið. Rannsóknir benda til þess að um tveir af hverjum þremur Áströlum sem náð hafa 25 ára aldri séu of þungir og feitir.