Aðstoðarþjálfari ráðinn til Fram

Sigurður Þórir Þorsteinsson, hefur verið ráðinn sem aðstoðarþjálfari hjá meistaraflokki Fram í knattspyrnu. Sigurður sem er fyrrverandi þjálfari meistaraflokks Aftureldingar verður því nýráðnum þjálfara, Ásgeiri Elíassyni innan handar með liðið sem leikur í 1. deild karla í sumar.

Ferdinand tryggði Man Utd sigur á Liverpool

Rio Ferdinand tryggði Manchester United síðbúinn 1-0 sigur á Liverpool í stórviðureign liðanna í ensku úrvalsdeildinni í knattspyrnu á Old Trafford nú síðdegis. Sigurmarkið skoraði varnarmaðurinn með skalla á 90. mínútu eftir sendingu frá Ryan Giggs.

DiMarco hirti hæsta verðlaunaféð

Hinn bandaríski Chris DiMarco hreppti í dag hæsta verðlaunaféð á opna evrópska meistaramótinu í golfi þegar hann fór með sigur af hólmi í Abu Dhabi í dag. DiMarco lauk keppni á samtals 20 höggum undir pari en annar varð Svíinn Henrik Stenson á 19 höggum undir pari.

Juventus endurheimti 8 stiga forystu

Juventus endurheimti naumlega 8 stiga forystu sína á toppi ítölsku úrvalsdeildarinnar í knattspyrnu í dag þegar liðið sigraði Empoli 2-1. Eftir að hafa lent 0-1 undir á heimavelli sínum var það varnarmaðurinn Fabio Cannavaro sem gerðist hetja heimamanna og skoraði bæði mörk Juve.

Jafnt í hálfleik á Old Trafford

Nú stendur yfir einn af stórleikjum ársins í enska fótboltanum þar sem staðan er markalaus hjá Man Utd og Liverpool þegar flautað hefur verið til hálfleiks. Leikurinn hefur verið jafn þó Liverpool hafi verið meira með boltann sem nemur 57% gegn 43% heimamanna í Man Utd. Leikurinn hófst kl. 16:05 og er hægt að fylgjast með gangi mála í honum hér á úrslitaþjónustu Vísis hægra meginn á íþróttasíðunni.

Grönholm sigraði með mínútu forskoti

Marcus Grönholm fór með sigur af hólmi í Monte Carlo-rallinu sem lauk í dag en þessi snjalli Finni ekur á Ford. Grönholm varð rúmri mínútu á undan heimsmeistaranum Sebastien Loeb sem stal senunnni í rallinu í gær þegar hann gerði sér lítið fyrir og vann allar sérleiðir dagsins.

Slæm byrjun hjá Arnari í Hollandi

Arnar Þór Viðarsson lék í dag sinn fyrsta leik með hollenska úrvalsdeildarliðinu Twente sem tapaði á heimavelli fyrir Ajax 2-3. Arnar lék allan leikinn með Twente sem var með unninn leik í lúkunum en staðan var 2-1 fyrir Twente þegar 2 mínútur voru til leiksloka. Þá urðu Arnari á dýr mistök...

Charlton stöðvaði sigurgöngu Chelsea

Chelsea mistókst að vinna sinn ellefta sigur í röð í ensku úrvalsdeildinni í dag þegar meistararnir gerðu 1-1 jafntefli við Charlton. Eiður Smári Guðjohnsen kom Chelsea yfir á 18. mínútu en Marcus Bent kom inn á af varamannabekk Charlton og jafnaði metin. Bæði Eiður Smári og Hermann Hreiðarsson (Charlton) léku allan leikinn með sínum liðum.

Beckham og Carlos með glæsimörk fyrir Real Madrid

Real Madrid komst í gærkvöldi í 3. sæti spænsku úrvalsdeildarinnar í knattspyrnu með 3-1 sigri á Cadiz. Mörk úr tveimur heimsklassaaukaspyrnum frá Robert Carlos og David Beckham tryggðu sigurinn. Atlético Madrid komst í 11. sæti deildarinnar í gærkvöldi þar sem liðið er með 23 stig með góðum 0-2 útisigri Real Zaragoza. 8 leikir eru á dagkrá La Liga á Spáni í dag;

Stúdínur í undanúrslitin

Bikarmeistarar Hauka eru úr leik í bikarkeppni kvenna í körfubolta en þær töpuðu naumlega fyrir ÍS í 8 liða úrslitunum í gærkvöldi, 63-62. Leikurinn var æsispennandi allan tímann og höfðu Stúdínur 4 stiga forystu í hálfleik, 33-29 en leikið var í Kennaraháskólanum.

Eiður búinn að skora gegn Charlton

Eiður Smári Guðjohnsen er búinn að skora fyrir Chelsea gegn Charlton en liðin eigast nú við á Stamford Bridge í ensku úrvalsdeildinni í fótbolta. Mark Eiðs kom eftir rúmlega 17 mínútna leik eftir sendingu frá Damien Duff og gerði Eiður sér lítið fyrir og skallaði boltann í netið á nærstöng. Staðan 1-0.

Dagný í 43. sæti en Björgvin úr leik

Björgvin Björgvinsson frá Dalvík féll úr keppni í morgun í fyrri ferð á heimsbikarmótinu í skíðum í sem fram fer í Austurríki. Þá er Dagný Linda Kristjánsdóttir skíðakona frá Akureyri í 43. sæti í bruni kvenna á heimsbikarmótinu í St. Moritz í Sviss en síðar í dag verður keppt í svigi og með góðum árangri þar getur Dagný komist ofar þar sem sameiginlega er keppt í bruni og svigi í dag.

Eiður í byrjunarliði Chelsea gegn Charlton

Eiður Smári Guðjohnsen er í byrjunarliði Chelsea sem mætir Hermanni Hreiðarssyni og félögum í Charlton í ensku úrvalsdeildinni í fótbolta en leikurinn hófst kl. 13:30. Chelsea getur unnið sinn ellefta sigur í röð í deildinni í dag á meðan Charlton reynir að komast upp í efri hluta deildarinnar með sigri. Hermann er að venju í byrjunarliði Charlton.

West Ham kaupir sóknarmann á 7.25 milljónir punda

Enska úrvalsdeildarfélagið West Ham styrkti lið sitt til muna í dag þegar samningar náðust við 1. deildarlið Norwich City um kaup á sóknarmanninum Dean Ashton. Kaupverðið er engin skiptimynt eða 7.25 milljónir punda fyrir þennan 22 ára gamla leikmann. Ashton sem lék áður með U21 árs landsliði Englendinga skoraði 18 mörk í 46 leikjum fyrir Norwich.

LeBron James skoraði 51 stig

Ungstirnið LeBron James skoraði 51 stig þegar lið Cleveland Cavaliers vann 108-90 sigur á Utah Jazz í NBA deildinni í körfubolta í nótt. Þetta er í annað sinn á tímabilinu sem James skorar yrir 50 stig í leik en árangur hans í nótt er sérstakur á tvo vegu. Annars vegar í ljósi þess að hann spilaði meiddur á hné. "Vá. Það eina sem ég get sagt er VÁ," sagði þjálfari hans, Mike Brown.

Við verðum að vinna Liverpool

Ruud van Nistelrooy, sóknarmaður Manchester United, hlakkar gífurlega til stórleiks helgarinnar í enska fótboltanum en Rauðu Djöflarnir fá Liverpool í heimsókn á Old Trafford í dag. "Liverpool er á frábærri siglingu þessa dagana en við höfum unnið önnur lið í svipaðri stöðu áður..."

Létt hjá Inter Milan

Inter Milan saxaði á forskot Juventus niður í 5 stig á toppi ítölsku úrvalsdeildarinnar í knattspyrnu í kvöld með 3-0 sigri á Palermo. Inter er nú með 48 stig í 2. sæti deildarinnar en Juventus á leik til góða. Einnig í kvöld gerðu Lazio og Cagliari 1-1 jafntefli.

Guðjón á réttri leið með Notts County

Notts County, lið Guðjóns Þórðarsonar í ensku 2. deildinni í knattspyrnunni vann í dag þriðja leikinn af síðustu fjórum þegar liðið sigraði Shrewsbury 2-1. Notts County stefnir nú óðum ofar í deildinni og er nú í 11. sæti, aðeins fjórum stigum frá umspilssæti.

Grétar lék allan leikinn með Alkmaar

Grétar Rafn Steinsson lék allan leikinn með AZ Alkmaar sem gerði 1-1 jafntefli við Gröningen í hollenska fótboltanum í kvöld. Alkmaar er í 2. sæti deildarinnar með 45 stig og mistókst þannig að saxa meira á forskot toppliðs PSV Eindhoven sem er með 45 stig.

Garðar kom inn á hjá Dunfermline

Garðar Gunnlaugsson lék sínar fyrstu mínútur í skoska fótboltanum í dag þegar hann kom inn á sem varamaður hjá Dunfermline sem tapaði á útivelli, 3-1 fyrir Hibernian í Edinborg. Garðar sem fór frá Landsbankadeildarliði Vals í vetur kom inn á þegar 16 mínútur voru til leiksloka en náði ekki að setja mark sitt á leikinn í þetta sinn.

Eto'o með þrennu fyrir Kamerún

Markahæsti leikmaður spænsku úrvalsdeildarinnar í knattspyrnu, Samuel Eto'o sóknarmaður Barcelona stendur allstaðar undir væntingum þessa dagana en hann skoraði þrennu fyrir landslið Kamerún sem vann Angóla 3-1 á Afríkukeppninni í kvöld. Liðin leika í B-riðli og í hinum leik riðilsins vann Kongó 2-0 sigur á Tógó. Lomana Tresor LuaLua leikmaður Portsmouth í ensku úrvalsdeildinni skoraði annað mark Kongó.

NFL undanúrslitin annað kvöld

Á morgun verða leiknir undanúrslitaleikirnir í bandaríska fótboltanum NFL. Báðir leikirnir verða sýndir á Sýn. Denver Broncos og Pittsburg Steelers mætast í fyrri leiknum klukkan 20:30 og Seattle og Carolina í seinni leiknum um klukkan 22:30.

Loksins sigur hjá Sunderland

Botnlið Sunderland náði sínu 9. stigi í ensku úrvalsdeildinni i knattspyrnu í kvöld þegar liðið vann 0-1 útisigur á W.B.A. Það var Anthony Le Tallec sem skoraði markið mikilvæga á 72. mínútu en leiknum var að ljúka.

Gummi Ben áfram með Val

Guðmundur Benediktsson, miðju og sóknarmaður hjá Landsbankadeildarliði Vals í knattspyrnu ætlar að freista þess að leika áfram með Hlíðarendaliðinu í sumar. Óvíst hefur verið með hvort Guðmundur myndi hætta knattspyrnuiðkun vegna erfiðra meiðsla sem hafa hrjáð hann í mörg ár.

6 marka tap fyrir Frökkum

Íslenska handboltalandsliðið tapaði fyrir Frökkum, 30-36, í síðari æfingaleik liðanna á Ásvöllum nú undir kvöldið. Ísland átti góða möguleika í fyrri hálfleik og leiddi mestan hálfleikinn en Frakkar sigu framúr undir lok hans og voru yfir í hálfleik 15-17. Frakkar tóku öll völd í seinni hálfleik og náðu mest átta marka forskoti.

Mellor tryggði Wigan sigur í blálokin

Birmingham náði að laga markatöluna sína þegar liðið tók Portsmouth í bakaríið með 5-0 sigri í botnslagnum í ensku úrvalsdeildinni í fótbolta í dag. Tottenham sem er í 4. sæti gerði aðeins markalaust jafntefli við Aston Villa. Blackburn vann nauman útisigur á Newcastle, 0-1 og Neil Mellor lánsmaður frá Liverpool skoraði sigurmark Wigan á lokamínútu leiksins í 2-3 sigri á Middlesbrough.

Ísland 15-17 undir í hálfleik

Íslendingar eru tveimur mörkum undir gegn Frökkum, 15-17 í hálfleik en síðari æfingaleikur liðanna fer nú fram á Ásvöllum í Hafnarfirði. Íslenska liðið hefur leitt mest allan leikinn með einu marki en Frakkarnir sigu fram úr undir lok fyrri hálfleiks. Markvarslan hefur ekki verið góð hjá íslenska liðinu sem á einnig í vandræðum með sendingar.

Haukastúlkur lögðu ÍBV

Haukastúlkur unnu auðveldan sigur á ÍBV í toppbaráttu DHL-deildar kvenna í handbolta í dag, 36-28 en leikið var á Ásvöllum. Ramune Pekarskyté var markahæst Haukastúlkna með 10 mörk.

Gylfi á bekknum hjá Leeds

Gylfi Einarsson er kominn á varamannabekkinn hjá Leeds sem leikur nú gegn Sheffield Wednesday í ensku 1. deildinni í fótbolta. Þetta er annar leikurinn í röð sem Gylfi er á bekknum en hann er að snúa aftur eftir meiðsli.

Everton lagði Arsenal

Everton gerði sér lítið fyrir og sigraði Arsenal, 1-0 á heimavelli sínum, Goodison Park í ensku úrvalsdeildinni í fótbolta í dag. James Beattie skoraði eina mark leiksins á 13. mínútu. Þar með mistókst Arsenal að hrifsa 4. sæti deildarinnar af Tottenham sem þar situr þremur stigum ofar með 40 stig. Everton lyfti sér hins vegar upp í 11. sætið með 29 stig.

Egyptar og Fílabeinsströndin unnu

25. Afríkumótið í fótbolta hófst í gær með leik heimamanna Egypta og Líbíu þar sem heimamenn fóru með sigur af hólmi, 3-0 en liðin leika í A-riðli. Síðari leik riðilsins í fyrstu umferð var svo að ljúka þar sem Fílabeinsströndin vann 1-0 sigur á Marokkó.

Everton yfir gegn Arsenal

Everton er 1-0 yfir á heimavelli sínum gegn Arsenal í ensku úrvalsdeildinni í knattspyrnu en verið var að flauta til hálfleiks. James Beattie skoraði markið á 13. mínútu. Arsenal er í 5. sæti deildarinnar með 37 stig, fjórum stigum á eftir Tottenham sem er í 4. sæti. Everton er hins vegar að berjast fyrir tilveru sinni í deildinni og er í 14. sæti með 26 stig.

Cudicini framlengir hjá Chelsea

Ítalski knattspyrnumarkvörðurinn Carlo Cudicini hefur skrifað undir nýjan samning við Chelsea sem gildir til ársins 2009. Þessi tíðindi koma nokkuð á óvart sérstaklega í ljósi þess að Ítalinn þykir einn besti markvörðurinn í enska boltanum og hefur aðeins fimm sinnum fengið að leika í vetur.

Kvikmyndastjarna etur kappi við atvinnumenn

Chad Campell heldur fjögurra högga forustu sinni á Bob Hope mótinu í golfi. Bob Hope mótið er spilað á fimm dögum á fjórum mismunandi völlum. Áhugamenn fá þarna tækifæri til að spila við atvinnumenn og er einn af þessum áhugamönnum, kvikmyndaleikarinn Matthew McConaughey sem átti eitt af bestu höggum gærdagsins.

Mest umtalaði unglingurinn síðan Rooney

Mest umtalaði ungingurinn í breskum fótboltaheimi síðan Wayne Rooney sló í gegn fyrir 3 árum, gekk í gær í raðir Arsenal frá 1. deildarliði Southampton. Theo Walcott er aðeins 16 ára en hefur þrátt fyrir það vakið óvenju mikla athygli undanfarin ár miðað við jafnaldra sína í bransanum.

Seinni leikurinn gegn Frökkum í dag

Tveir handboltaleikir verða háðir á Ásvöllum í dag þar sem boðið verður upp á báða leikina á verði eins. Kl.14:00 hefst leikur Hauka og ÍBV í DHL deild kvenna og kl.16:15 hefst seinni leikur Íslendinga og Frakka.

Parker sló persónulegt met

38 stig frá Kobe Bryant dugðu ekki fyrir Los Angles Lakers sem töpuðu fyrir Phoenix Suns í NBA körfuboltanum í nótt, 106-93. Þetta var sjötti tapleikur Lakers í röð fyrir Phoenix. Tony Parker settti persónulegt stigamet þegar hann skoraði 38 stig fyrir San Antonio Spurs sem unnu 101-94 sigur á Miami Heat.

Palace og Reading skildu jöfn

Ívar Ingimarsson og félagar í Reading gerðu 1-1 jafntefli við Crystal Palace í ensku 1. deildinni í knattspyrnu í kvöld. Ívar spilaði allan leikinn fyrir Reading, en Brynjar Björn Gunnarsson var á varamannabekknum og kom ekki við sögu í leiknum. Reading er enn á toppi deildarinnar með 73 stig en Palace er í því 5. með 48 stig.

Egyptar unnu opnunarleikinn

Egyptar unnu góðan sigur á Líbíu 3-0 í opnunarleik Afríkukeppninnar í knattspyrnu sem hófst í Egyptalandi í dag. Það voru þeir Mohamed Aboutrika, Ahmed Hassan og Mido, framherji Tottenham Hotspurs, sem skoruðu mörk Egypta í leiknum.

Höttur fær liðsstyrk

Úrvalsdeildarlið Hattar á Egilsstöðum hefur fengið til sín serbneskan leikmann að nafni Zekovic Milojica sem er 202 cm hár framherji og á að baki landsleiki fyrir þjóð sína. Að sögn Gísla Sigurðssonar, leikmanns Hattar, er Milojica þessi hinn mesti hvalreki fyrir liðið og ku vera góð skytta og frábær liðsmaður.

Grönholm í forystu eftir að Loeb lenti í óhappi

Heimsmeistarinn og þrefaldur sigurvegari í Monte Carlo-rallinu, Sebastien Loeb, lenti í óhappi á sjöttu sérleiðinni í dag og því hefur Marcus Grönholm nú náð forystu í keppninni. Grönholm hefur 23,7 sekúndna forystu á Ástralann Chris Atkinson og Tony Gardemeister er í þriðja sætinu á Peugeot.

Hamri dæmdur sigur á Keflavík

Dómstóll KKÍ hefur dæmt liði Hamars/Selfoss sigur í leik liðsins gegn Keflavík þann 12. janúar síðastliðinn, eftir að sannað þótti að Guðjón Skúlason leikmaður Keflavíkur var ekki löglegur með liðinu vegna þess að um frestaðan leik var að ræða. Hamri hefur því verið dæmdur 20-0 sigur í leiknum.

Crystal Palace - Reading í beinni

Í kvöld klukkan 19:35 verður bein útsending frá leik Crystal Palace og Reading í toppbaráttu 1. deildarinnar á Englandi. Þar fá áhorfendur væntanlega að sjá þá Brynjar Björn Gunnarsson og Ívar Ingimarsson í eldlínunni með Reading, sem hefur gengið allt í haginn á leiktíðinni.

NBA veisla á Sýn í kvöld

Tveir NBA leikir verða sýndir á sjónvarpsstöðinni Sýn í kvöld. Klukkan 23:00 verður útsending frá leik New York Knicks og Detroit Pistons sem fór fram í gærkvöldi, en strax þar á eftir verður stórleikur Miami Heat og San Antonio sýndur í beinni útsendingu.

Portsmouth kært vegna ráðningar Redknapp

Enska knattspyrnusambandið hefur kært úrvalsdeildarlið Portsmouth vegna ráðningar Harry Redknapp frá Southampton á sínum tíma. Sambandið vill meina að Portsmouth hafi brotið reglur þegar félagið setti sig í samband við Redknapp á sínum tíma, eftir að hafa fengið undir hendur kæru frá Southampton.