Stúdínur í undanúrslitin

Bikarmeistarar Hauka eru úr leik í bikarkeppni kvenna í körfubolta en þær töpuðu naumlega fyrir ÍS í 8 liða úrslitunum í gærkvöldi, 63-62. Leikurinn var æsispennandi allan tímann og höfðu Stúdínur 4 stiga forystu í hálfleik, 33-29 en leikið var í Kennaraháskólanum.

Maria Conlon var stigahæst Stúdína með 26 stig en Meagan Mahoney hjá Haukum með 25 stig. Úrslitin verða að teljast frekar óvænt í ljósi stöðu liðanna í deildinni en 14 stigum munar á liðunum þar sem Haukastúlur eru efstar með 24 stig.

8 liða úrslit bikarkeppni KKÍ og Lýsingar halda áfram í kvöld með leik Grindavíkur og Hauka B suður í Grindavík og hefst leikurinn kl. 19.15. Á morgun mánudag mætast Skallagrímur og Keflavík í Borgarnesi og 8 liða úrslitunum lýkur á miðvikudag með leik Keflavíkur B og Breiðabliks. Undanúrslitin hefjast 5. febrúar.