„Svo­lítið sér­stakt“ að nætur­vaktin hafi sinnt fleiri út­köllum

Frá þessu er greint í færslu sem birt var á Facebook-síðu Slökkviliðsins á höfuðborgarsvæðinu áðan en þar segir að næturvaktin hafi sinnt fimmtíu og þremur útköllum en dagvaktin fjörutíu og níu. Það munaði þannig ekki miklu.

Dælubílar fóru í fimm útköll en í færslunni segir að það „þyki alltaf svolítið sérstakt“ þegar næturvaktin sinni fleiri útköllum en dagvaktin. 

Nú sé hin svokallaða B-vakt heima að hvíla sig eftir annasama nótt, hún sé svo aftur á vakt í kvöld og eftir það komin í nokkurra daga frí.

Á myndinni sem fylgdi færslunni mátti sjá þrjá slökkviliðsmenn laga sjúkrabörur en til hliðar við þá stendur einn og hjálpar ekki til, sá var að drekka kaffi.