Conor vill stíga síðasta dansinn við Holloway

Eftir fimm ára bið fengu aðdáendur Conors að sjá hann aftur í búrinu fyrr í þessum mánuði. Reyndar ekki lengi því stöðva þurfti bardaga Conors og Holloways eftir aðeins 69 sekúndur eftir að sá fyrrnefndi meiddist illa á hné. Seinna kom í ljós að Írinn sleit krossband.

Conors bíður löng endurhæfing vegna hnémeiðslanna en þegar henni er lokið vill hann mæta Holloway aftur.

„Það sem átti að vera söguleg útreið verður núna endurstillt. IFW 2027. Síðasti dansinn,“ skrifaði Conor á Instagram.

Conor á einn bardaga eftir á samningi sínum við UFC og vill að hann verði gegn Holloway.

Ef ósk hans rætist verður það þriðji bardagi Conors og Holloways. Conor sigraði Holloway 2013 en Holloway bar sigur úr býtum í bardaganum stutta á dögunum.

Conor hefur tapað síðustu þremur bardögum sínum á ferlinum en fara þarf aftur til janúar 2020 til að finna síðasta sigur hans.