Ivanka Trump og Jared Kushner á Ís­landi

„Ég get staðfest að hjónin eru á landinu í einkaerindum,“ segir Ægir Þór Eysteinsson, fjölmiðlafulltrúi utanríkisráðuneytisins, í samtali við Vísi. 

Hann vísaði að öðru leyti á bandaríska sendiráðið. Vísir hefur beint fyrirspurn á sendirráðið en ekki fengið svör.

Rúv greindi fyrst frá og segir hjónin hafa lent á Akureyrarflugvelli í gær og dvelja á lúxushótelinu í Deplum í Fljótum. Þau hafi átt leið um Skagafjörð í gær. 

Kushner hefur verið ráðgjafi Donalds Trumps Bandaríkjaforseta í utanríkismálum. Hann var meðal annars sá sem kynnti áform Trumps um Gasaströndina.

Hvert erindi þeirra hjóna er á Íslandi liggur ekki fyrir en þau Kushenr hefur haslað sér völl á fasteignamarkaði. Mikil mótmæli brutust út í Albaníu í byrjun júní þegar Kushner og Trump sóttu landið heim í von um að koma á fót lúxushóteli þar í landi, að því er Guardian greindi frá.

Frétt hefur verið uppfærð.