Sundæfingar Andreu skiluðu silfurverðlaunum á breska meistara­mótinu

Mótið er gífursterkt, enda bestu keppendur Bretlands þar saman komnir, og eru meðal þeirra Kate Shortman og Izzy Thorpe, báðar silfurverðlaunahafar á Ólympíuleikunum í París 2024.

Í tæknisundi framkvæma einstaklingar fimm tilgreindar tækniæfingar í sundi, til dæmis ákveðna snúninga eða fótastöður, í fyrirfram ákveðinni röð. Rútínan endist í rúmar tvær mínútur en áhersla er lögð á nákvæmni, styrk og útfærslu.

Stigagjöfin byggist á þremur meginþáttum: framkvæmd, listrænum áhrifum og heildar erfiðleikastigi æfinganna.

Andrea hlaut silfurverðlaun fyrir sína frammistöðu og varð þar með fyrst Íslendinga til að vinna verðlaun í samhæfðu listsundi á alþjóðlegum vettvangi.

Silfurverðlaunin skiluðu sér eftir stífar æfingar hér heima en Andrea keppti einnig nýlega á Spring Harmony mótinu í Póllandi og vann til gull- og bronsverðlauna.

Á breska meistaramótinu keppti Andrea einnig í para- og liðakeppni en komst ekki á verðlaunapall.