„Ég elska að vera hérna í Grinda­vík“

„Við ætluðum að koma inn í þennan leik og ná smá takti fyrir úrslitakeppnina og mér fannst við sýna það í dag. Það var geggjuð mæting og gaman að spila fyrir framan allt þetta fólk,“ sagði Unnsteinn eftir leik en eðlilega var hann ánægður með frammistöðuna og stemninguna í höllinni.

Unnsteinn kom inn í leikinn eins og stormsveipur og skaut af miklu öryggi. Hann var með 69% skotnýtingu og hitti þar af sex af níu þriggja stiga skotum.

„Ég reyni að nýta mín tækifæri eins mikið og ég get. Ég fékk tækifæri núna og tók það bara.“

Framlag Unnsteins vakti mikla lukku meðal stuðningsmanna í kvöld og var hverri körfu hans fagnað vel. Ljóst er að Unnsteini líður vel í Grindavík og verður áhugavert að fylgjast með honum í úrslitakeppninni þar sem Grindavík fer inn með heimavallarrétt.

„Ég elska að vera hérna í Grindavík. Stuðningmennirnir eru besta fólkið hérna.“