Of mikill snjór til að halda skíðamót í Hlíðar­fjalli

Núna í vikunni fer alþjóðlega FIS bikarmótið 66 North Cup fram í Hlíðarfjalli. Þar er allt besta skíðafólk Íslands mætt til keppni ásamt erlendum keppendum. Um helgina fara svo fram Skíðamót Íslands í alpagreinum (í Hlíðarfjalli) og í skíðagöngu (á Ólafsfirði).

Þegar bikarmótið hófst í Hlíðarfjalli í gær var gul viðvörun í gildi, snjóþunginn mikill og skyggnið slæmt. Annar keppnisdagur mótsins af þremur átti svo að fara fram í dag en keppni hefur verið frestað fram á morgundaginn.

„Í gær kepptum við í krefjandi aðstæðum en þetta gekk allt upp, með mikilli hjálp frá sjálfboðaliðum sem mokuðu mikinn snjó og gerðu það að verkum að það var hægt að keppa.

Svo hefur snjóað í alla nótt og það er svo sem búið að vinna í brekkunum í alla nótt líka, en það er mjúkt færi enn þá og það mun halda áfram að snjóa í dag. Þess vegna metum við það sem svo að við séum ekki með nægilegt skyggni eða nógu gott færi.

Þannig að við færum mót dagsins yfir á morgundaginn og tökum þá tvær stórsvigskeppnir á morgun. Veðurspáin lítur vel út fyrir morgundaginn,“ sagði Kristinn Magnússon, mótsstjóri, í samtali við Vísi.

Vonandi tekst að klára allar keppnir á morgun, því á fimmtudag verður önnur gul viðvörun í gildi yfir allt landið og ólíklega hægt að keppa. Miðað við veðurspána á morgun er Kristinn bjartsýnn á að það takist, en það mun líka krefjast mikils snjómoksturs hjá sjálfboðaliðum.

„Já, það lítur bara frekar vel út á morgun. Við byrjum að vinna í brekkunum núna seinni partinn í dag og vinnum alla nóttina til að ná fram sem bestum aðstæðum. Hlíðarfjall vinnur þrekvirki þar. Svo verður mikið af fólki sem mun hjálpa okkur og við erum mjög þakklát fyrir það, alla sem koma að þessu móti. Það segir sitt um skíðahreyfinguna, hvað hún er samheldin, að það var fólk úr flestum skíðafélögum á landinu mætt til að moka í Hlíðarfjalli í gær. Við hjálpumst öll að í þessu,“ sagði Kristinn.

Nánar má lesa um bikarmótið og Skíðamót Íslands á heimasíðu Skíðasambandsins.