Enginn McGregor eða Jon Jones: Bar­dagarnir í Hvíta húsinu valda miklum von­brigðum

„Þó enginn efist um að bardaginn í Hvíta húsinu þann 14. júní verði sá stærsti í sögunni hvað umgjörðina varðar, verður að segjast að þessir bardagar valda miklum vonbrigðum

Meira að segja UFC virðist skammast sín fyrir þetta, þess vegna eru þessir kappar kynntir á einhverjum litlum blaðamannafundi frekar en með pomp og prakt í almennilegri sjónvarpsútsendingu. Dana White viðurkenndi síðan að þetta væri ekki eins gott og hann hafði vonast“ segir í umfjöllun MMA Mania.

Dana White sagði frá því á blaðamannafundi í nótt hvernig bardagakvöldinu yrði stillt upp. Stærstu nöfnin þar á blaði verða Justin Gaethje og Ilia Topuria í bardaga um léttvigtartitilinn og Alex Pereira og Ciryl Gane í bardaga um þungavigtartitilinn.

Margir UFC aðdáendur höfðu vonast eftir stærri nöfnum á blað og þá höfðu glæsilegar endurkomur verið í umræðunni. Slúðrað var um að Conor McGregor eða Jon „Bones“ Jones, jafnvel báðir, myndu mæta aftur með látum. Svo verður ekki.

„Aldrei, aldrei nokkurn tímann. Ég sagði ykkur það hundrað þúsund sinnum. Jon Jones var aldrei inni í myndinni. Í fyrsta lagi hef ég sagt af hverju ég vil ekki sjá hann. Í öðru lagi þá eru mjaðmir hans handónýtar. Ég veit ekki hvort þið sáuð fánafótboltaleikinn um daginn, hann gat varla hlaupið. Jon Jones hætti út af meiðslum í mjöðmunum. Hann er með mjaðmagigt. Læknarnir segja að hann eigi að fara í mjaðmaskipti. Þið getið bætt því við listann yfir ástæður þess að ég vilji ekki sjá hann,“ sagði Dana White um Jon Jones.