Vildi vinna fyrir dóttur sína en klúðraði því al­gjör­lega

Echavarria, sem var þremur höggum á eftir þegar þrjár holur voru eftir, lék á 66 höggum eða fimm undir pari á sunnudaginn og vann mótið. Hann lauk keppni á samtals sautján höggum undir pari, eða 267 höggum, og var tveimur höggum á undan Lowry, Austin Smotherman og Taylor Moore.

Lowry klúðraði sigrinum með tveimur tvöföldum skollum í röð á sextándu holu, sem er par-4, og sautjándu holu, sem er par-3, en báðir komu eftir teighögg sem fóru langt til hægri og út í vatn.

Ég kastaði því frá mér

„Ég er augljóslega gríðarlega vonsvikinn,“ sagði Lowry. „Ég hafði mótið í höndunum á mér og ég kastaði því frá mér. Hvað meira get ég sagt? Þetta er í annað sinn á þessu ári. Ég er að verða góður í þessu. Ég spilaði ótrúlega allan daginn og eitt slæmt högg á sextándu holu sló mig alveg út af laginu á síðustu þremur holunum. Þetta hefur aldrei komið fyrir mig áður.“

Lowry varð í öðru sæti árið 2022 þegar mótið hét enn Honda Classic og missti þá forystuna eftir að hafa lent í úrhelli á lokaholunni. Hann jafnaði í fimmta sæti á PGA National ári síðar, hafði forystuna einn fyrir lokahringinn áður en hann endaði jafn í fjórða sæti árið 2024 og endaði síðan í ellefta sæti í fyrra.

Lowry hefur ekki unnið mót í Bandaríkjunum síðan á Bridgestone Invitational árið 2015; hann sigraði með Rory McIlroy á Zurich Classic árið 2024 og hinn 38 ára gamli var hluti af sigurliðinu í Ryder-bikarnum síðasta haust, þegar hann stöðvaði draum Bandaríkjanna um sögulega endurkomu með sigurpúttinu.

Erfitt að kyngja þessu

„Hvernig getur mér liðið svona núna þegar ég fór í gegnum það sem ég gerði í september síðastliðnum á Bethpage og komst vel í gegnum það?“ sagði Lowry. „Mér fannst þetta bara skrítið þarna úti; ég fann bara ekki fyrir kylfuhausnum á síðustu þremur holunum eftir teighöggið mitt á 16. holu. Þetta var undarlegt. Hvað get ég sagt? Þetta eru mikil vonbrigði. Það verður erfitt að kyngja þessu.“

Lowry sagði að það erfiðasta við daginn hafi verið að vinna ekki fyrir framan dóttur sína í fyrsta sinn

„Það erfiðasta við daginn í dag er að ég hef aldrei náð að fagna sigri fyrir framan fjögurra ára dóttur mína. Hún var þarna að bíða eftir mér. Ég vildi bara vinna fyrir hana í dag. Mér er sama um allt annað. Mig langaði bara svo mikið að sjá rauðhærðu stelpuna mína hlaupa um á átjándu flötunni. Það hefði verið það besta í heimi,“ sagði Lowry.

„Ég hélt að ég myndi vinna. Ég fór ekkert fram úr sjálfum mér og mér leið mjög vel þarna úti. Ég gerði bara eiginlega það eina sem ég mátti ekki gera,“ sagði Lowry niðurlútur.