„Besta tap ævi minnar“

Svíar unnu vissulega leikinn en það voru samt Slóvakar sem fögnuðu eftir að hafa tekist að skora lokamark leiksins þegar skammt var eftir.

Það mark dugði nefnilega Slóvakíu til að vinna riðilinn og komast beint áfram í 8-liða úrslit keppninnar, á innbyrðis úrslitum.

Eins og Íslendingar þekkja vel úr handboltanum þá gilda innbyrðis úrslit í íshokkíinu, þegar lið enda jöfn. Með sigri Svía í gær enduðu Svíþjóð, Slóvakía og Finnland öll jöfn, með sex stig hvert.

Slóvakar enduðu hins vegar með +1 í innbyrðis markatölu, Finnar með 0 og Svíar með -1.

„Þetta er æðislegt. Þetta er besta tap ævi minnar,“ sagði Dalibor Dvorsky, leikmaður Slóvakíu, sigurreifur eftir tapleik.

Það var hann sem skoraði markið mikilvæga á lokamínútunni í gær.

Finnar komast mögulega einnig beint áfram í 8-liða úrslitin en Svíar enduðu í 3. sæti riðilsins og þurfa að fara í umspil á þriðjudaginn á meðan að Slóvakar hvílast.

„Við spiluðum betur í dag. Auðvitað er óheppilegt að við skulum hafa komist þremur yfir en hleypt inn marki þegar það voru einhverjar 30 sekúndur eftir,“ sagði Adrian Kempe, leikmaður sænska liðsins.

„Við þurfum að spila annan leik við eitthvað lið en það er líka bara tækifæri fyrir okkur til að tengja enn betur saman sem lið, vinna í smáatriðunum og fínpússa okkar leik sem lið. Þannig lít ég á þetta,“ sagði Kempe.