„Eitt og annað sem við þurfum að vinna í“

Njarðvíkingar virtust vera með sigurinn í höndunum en þeir voru tólf stigum yfir þegar rúmar tvær mínútur voru eftir af leiknum. Þá hrukku Grindvíkingar loksins í gang og tryggðu sér framlengingu á ótrúlegan hátt.

Jóhann Þór Ólafsson, þjálfari Grindavíkur, átti erfitt með að koma tilfinningum sínum í orð eftir leik.

„Allskonar maður. Mér fannst við einhvernveginn aldrei komast í takt fyrr en bara rétt í, eða svona allan leikinn. Þetta fer aldrei lengra en í einhver 12-14 stig. Svo er Khalil og setur hérna einhver risaskot og kemur okkur innfyrir tíu.“

„Svo er það bara þessi vítaleikur þegar það er mínúta eftir. Hann [Khalil] klikkar úr vítinu og Jordan gerir vel að koma þessu í framlengingu. Svo bara frábært varnar „play“ hérna í restina. Allskonar tilfinningar fram og til baka. 

Tileinkaði Stebba Kristjáns sigurinn

„Bara ánægður með sigurinn. Stefán heitinn Kristjánsson hefði átt afmæli í dag og þetta var fyrir hann og hans fólk. Ætli hann hafi ekki átt stóran þátt í þessu kallinn, við trúum því.“

Þrátt fyrir að spila frekar slaka vörn í um það bil 38 mínútur í kvöld var það að lokum varnarleikurinn sem innsiglaði sigurinn, þegar Kane og Shabazz stálu boltanum af Dwayne Lautier í lokasókn Njarðvíkur. Jóhann viðurkenndi að það hefði verið sætt að loka leiknum þannig.

„Algjörlega. Við vorum að ræða saman aðeins inni í klefa áðan. Það eru allskonar hlutir sem við vorum mjög góðir í framan af, þá sérstaklega varnarleikur sem við erum einhvern veginn farnir að taka sem sjálfsögðum hlut. Við þurfum að finna það aftur og hvernig við vinnum fyrir hvern annan og erum með staðsetningar og annað á hreinu. Þetta er eitt og annað sem við þurfum að vinna í en það er ekki mikill tími til að æfa. Við spilum mikið núna í janúar þannig að verkefnið er krefjandi en bara áfram gakk.“