Stefndi á ÓL en fannst látinn á hótel­her­bergi

Bakken hafði átt góðu gengi að fagna á heimsbikarmótum að undanförnu og var að undirbúa sig fyrir Vetrarólympíuleikana sem fram fara í febrúar.

Hætti í tvö ár vegna hjartavandamála

Hann var kominn á fulla ferð í sinni íþrótt, eftir að hafa neyðst til að draga sig í hlé vegna hjartavöðvubólgu sem hann kvaðst hafa farið að finna fyrir eftir þriðja skammt af bóluefni gegn Covid. 

Það tók hann næstum tvö ár að snúa aftur til hefðbundinna æfinga en það tókst í fyrra og Bakken virtist á hárréttri braut fyrir Vetrarólympíuleikana sem fara einmitt fram á Ítalíu.

Bakken var mættur í alpabæinn Lavaze, eftir að hafa keppt í heimsbikarnum í Le Grand-Bornand í Frakklandi í síðustu viku.

Ítölsk yfirvöld rannsaka nú andlát hans og segir Emilie Nordskar, framkvæmdastjóri norska skíðaskotfimisambandsins, að dánarorsök liggi ekki fyrir.

„Hugur okkar er fyrst og fremst hjá fjölskyldu Siverts og öllum þeim sem stóðu honum næst. Við vinnum með ítölskum yfirvöldum á staðnum,“ sagði Nordskar í fréttatilkynningu.

Dánarorsök liggur ekki fyrir

Ítalskir miðlar á borð við La Gazzetta dello Sport segja Bakken hafa látist vegna veikinda en í samtali við NRK í Noregi segir Nordskar ekki hægt að segja mikið að svo stöddu.

„Það sem við vitum er að Sivert fanns látinn á hótelherbergi sínu í alpabænum Laveze á Ítalíu í dag. Við erum auðvitað í sambandi við ítölsku lögregluna á svæðinu. Hún er á fullu og við vinnum náið með henni. Við vitum ekki hver dánarorsökin er. Það er lögreglunnar að finna út úr því. Núna styðjum við við fjölskyldu Siverts og hans nánasta fólk, liðsfélaga og aðra í skíðaskotfimifjölskyldunni,“ sagði Nordskar en efnt var til minningarathafnar í Lillehammer í gærkvöld.

Bakken vann tvenn gullverðlaun á Vetrarólympíuleikum ungmenna árið 2016 og hann vann sín fyrstu og einu heimsbikargullverðlaun í Holmenkollen árið 2022, áður en hann þurfti að draga sig í hlé eins og fyrr segir.